"Фантастик продакшн"-ы уран бүтээл болох “37-р точка” олон ангит уран сайхны киноны нэг, хоёрдугаар бүлэг үзэгчдийн хүртээл болсон билээ. Нэг бүлэг нь 10 ангитайгаар нийт 20 анги гарсан тус бүтээл олон асуулттайгаар дууссан юм. Үзэгч фенүүдийн дунд кино төгсөөгүй байх гэсэн хүлээлт үүсгэсэн бол зарим үзэгчдийн хувьд гол дүр нь болох Ялалт үхсэн тул кино үргэлжлэхгүй гэсэн бат итгэлийг төрүүлсэн.
Тэгвэл тус уран бүтээл төгсөөгүй бөгөөд дахин нэг анги гарах гэнэ. Төгсгөлийн анги болон гарах сүүлийн бүтээл нь бүрэн хэмжээний уран сайхны кино болон үзэгчдийн хүртээл болох аж.
Үзэгч фенүүдийнхээ эргэлзээг тайлахаар "Фантастик продакшн"-ы уран бүтээлчид өөрсдийн албан ёсны цахим хуудсаараа дамжуулан лайв хийлээ.
Лайвын үеэр киноны ерөнхий найруулагч Б.Тамир: "37-р точка олон ангит уран сайхны киноны төгсгөлийн анги буюу бүрэн хэмжээний уран сайхны кино удахгүй гарна. Дахин нэг ангийг үзэгчдийн хүртээл болгоно" гэж мэдэгдэв.
Төгсгөлийн ангийг хэзээ олон нийтийн хүртээл болгох товыг удахгүй зарлахаа мөн хэлсэн юм.
Магадгүй коронавирусийн халдвараас урьдчилан сэргийлэх хорио цээрийн хугацаа дууссаны дараа кино театруудаар гаргах төлөвлөгөөтэй байж болох юм. За ямартай ч үзэгч, фенүүд дахин хүлээлтэнд оров.
Кино бүтээл удахгүй цацагдаж үзэгчдийн эргэлзээг тайлах нь батлагдлаа.