Гэмтэл согог судлалын үндэсний төв (ГССҮТ) болон EEJII.org сангийн хамтын ажиллагааны хүрээнд сайн дурын ажилтнууд гурав дахь жилдээ тус төвийн Яаралтай тусламж болон Амбулаторийн тасгуудад хөтөч, зөвлөн туслагчаар ажиллаж байна. Тэд тусламж үйлчилгээ авахад хүндрэлтэй нөхцөл үүсдэг үе, тэр дундаа зуны улирал болон Үндэсний их баяр наадмын үеэр иргэдэд эмнэлгийн үйлчилгээ түргэн шуурхай, хүртээмжтэй хүрэхэд дэмжлэг үзүүлж буй нь энэ юм.
2025 оны зургаадугаар сарын 20-ноос наймдугаар сарын 20-ны хооронд нийт 51 сайн дурын ажилтан өдөр, оройн ээлжинд ажиллах хуваарьт хамрагдсан бөгөөд тэд хөтөч, мэдээллийн ажилтан, орчуулагч, тайлбарлагч, сахиур зэрэг олон чиглэлээр дэмжлэг үзүүлнэ. Ийнхүү сайн дурын ажилтнуудын оролцоо нь эмч, эмнэлгийн ажилтнуудын ачааллыг бууруулах, иргэдийг зөв үйлчилгээнд хурдан чиглүүлэх, хэлний бэрхшээлтэй иргэдэд тайлбар, туслалцаа үзүүлэхэд чухал үүрэгтэй юм.
Энэхүү хамтын ажиллагааны хүрээнд ГССҮТ-ийн Үйл ажиллагаа хариуцсан дэд захирал Б.Батзориг, EEJII.org сангийн захирал Э.Должинсүрэн болон холбогдох албаны төлөөлөл сайн дурын ажилтнуудтай уулзалт хийж, цаашдын ажлын чиглэлийг тодорхойлсон байна.
Эх сурвалж: ГССҮТ.
