Эрдэмтэд Мароккогийн Бульман хотын ойролцоо орших Атлассын уулсаас эртний хуягт үлэг гүрвэлийн чулуужсан ясны хэсгийг илрүүлсэн тухай CNN мэдээлэв. Энэхүү олдвор нь Цэрдийн галавын үед амьдарч байсан Spicomellus нэртэй шинэ төрлийн үлэг гүрвэлд хамаарах бөгөөд урьдчилсан тооцооллоор дөрвөн метр орчим урт, хоёр тонн жинтэй байжээ.
Spicomellus нь анкилозаврын төрөлд хамаарах бөгөөд танк хэлбэрийн биеийн бүтцээрээ алдартай. Английн Бирмингемийн их сургуулийн палеонтологич Ричард Батлерын тайлбарласнаар, энэхүү үлэг гүрвэл нь бусдаас ялгарах өвөрмөц онцлогтой байсан аж. Түүний хавирга бүрт өргөс мэт том хуяг байрлаж, хүзүүг нь тойроод “гольфын цохиур шиг урт өргсүүд” сүндэрлэж байсан нь махчин амьтдаас хамгаалахын зэрэгцээ хосоо татах гоёл чимэглэл байж болохыг эрдэмтэд таамаглаж байна.
Spicomellus-ийн чулуужсан үлдэгдэл өмнө нь зөвхөн нэг хавирганы тасархай байдлаар 2021 онд бүртгэгдэж байсан бол энэ удаагийн нээлт түүний бүтцийг илүү тодорхойлох боломж олгожээ. Судлаачдын үзэж буйгаар энэхүү олдвор нь хуягт үлэг гүрвэлүүдийн хувьслын онцлогийг илүү гүнзгий судлах чухал боломж нээж өгч байна.
Эх сурвалж: CNN, Iz.ru
