Дэлхийн худалдааны байгууллага (ДХБ) болон Олон улсын худалдааны төв (ОУХТ)-ийн хамтарсан “Цахим эдийн засаг дахь экспортлогч эмэгтэйчүүдийг дэмжих сан” буюу WEIDE-ийн санхүүжилтэд Монгол Улсын аж ахуйн нэгжүүд шалгарсан талаар Женев дэх Элчин сайдын яам мэдээлэв. Энэхүү төслийг хэрэгжүүлэх анхны дөрвөн улсын нэгээр Монгол Улс энэ оны гуравдугаар сард Женев хотноо зарлагдсан юм.

Бүртгэлийн үеэр Монголын нийт 307 аж ахуйн нэгж хүсэлтээ гаргаснаас 50 орчим бизнес эрхлэгч эмэгтэй шалгарч, хоёр жилийн хугацаанд нэг сая ам.долларын өртөг бүхий санхүүжилт, сургалт зөвлөгөөн болон техникийн туслалцаа авах эрхтэй болжээ.

Тус сангаас цахим худалдаанд шинээр хөл тавьж буй гарааны бизнесүүдэд эхний санхүүжилт олгох, цахим орчинд оролцоогоо нэмэгдүүлж, олон улсын зах зээлд тэлэхэд бэлэн болсон аж ахуйн нэгжүүдэд дэмжлэг үзүүлэхээр тусгасан байна.

Шалгарсан бизнес эрхлэгчид Монголын экспортын тэргүүлэх чиглэл болох арьс шир, ноос ноолуур, хөдөө аж ахуй, үйлдвэрлэл, аялал жуулчлал, хүнсний технологи, инновацийн салбарт үйл ажиллагаа явуулдаг эмэгтэйчүүдийн төлөөлөл байгааг онцолжээ.

Эх сурвалж: Монгол Улсын Женев дэх Элчин сайдын яам