Украины дронуудын ээлжит халдлагын улмаас зогсоод байсан “Дружба” нефть дамжуулах хоолойн ажиллагаа дахин сэргэж, Оросоос Словак, Унгар руу түүхий газрын тос дамжуулж эхэлсэн талаар Унгарын MOL компани мэдээлжээ. Энэ мэдээллийг Словакийн Эдийн засгийн сайд Денис Саков баталж, “Дружба” хоолойгоор дахин нефть шахаж эхэллээ, нийлүүлэлт тогтвортой байх болтугай хэмээн өөрийн цахим хуудсаар дамжуулан мэдэгдсэн байна.
Харин энэ сарын 21-нд Украины дронууд Брянск мужийн “Унеча” нефть шахах станц руу дайрсны дараа нефть нийлүүлэлт бүрэн зогссон байсан бол өмнөхөн нь Тамбов мужийн шахуургын станц мөн адил халдлагад өртөж байжээ. Оросын тал хоёр өдрийн дараа станцын ажиллагааг сэргээсэн ч нийлүүлэлт тасалдаж, Европын зах зээлд эрсдэл үүсгэсэн байна.
Украины Ерөнхийлөгч Владимир Зеленский Тусгаар тогтнолын өдрөөр хийсэн мэдэгдэлдээ “Дружба” хоолойг Унгарын Европын Холбоонд хандах байр суурьтай шууд холбон тайлбарлаж, хоёр улсын найрамдалт харилцаа ирээдүйд хэрхэн үргэлжлэх нь Унгарын шийдвэрээс хамаарна гэж онцолжээ. Харин Унгарын Гадаад хэргийн сайд Петер Сийярто үүнийг заналхийлэл гэж үзэж, Украины Ерөнхийлөгчийн мэдэгдлийг эрс няцаан, Унгарын эрчим хүчний аюулгүй байдлын эсрэг аливаа довтолгоог даруй зогсоохыг уриалсан байна.
Эх сурвалж: DW