АНУ-ын Ерөнхийлөгч Дональд Трамп Балтимор хотод цэргүүдийг оруулна гэж мэдэгдлээ. Энэ нь Мэрилэнд муж улсын захирагч Уэс Муртай болсон маргаанаас үүдэлтэй юм. Уэс Мур ерөнхийлөгчийг тус хотод хамт алхаж, аюулгүй байдлыг өөрийн нүдээр шалгахыг урьсан ч Трамп нийгмийн сүлжээнд хандан “Лос-Анжелест гарсан шиг тусламж хэрэгтэй бол Вашингтонд байгаа цэргүүдийг Балтиморт илгээнэ” гэж бичжээ.

Энэ мэдэгдэл нь Ардчилсан намын удирддаг хотуудад Үндэсний гвардын цэргийг байрлуулах ажиллагааны хүрээнд гарсан бөгөөд уг арга хэмжээ хүчтэй эсэргүүцэл дагуулж байна. Зарим муж улсын захирагчид түүнийг эрх мэдлээ урвуулан ашиглаж байна гэж шүүмжилсэн бол Төлөөлөгчдийн танхимын Ардчилсан намын удирдагч Хаким Жеффрис ч мөн “Трампт ийм эрх мэдэл байхгүй” гэж мэдэгдэв.

Цагаан ордны мэдээлснээр Вашингтонд цэргүүдийг байрлуулснаар олон зуун хүнийг баривчилж, нийслэлийн аюулгүй байдал хангагдсан гэжээ. Гэвч Вашингтон хотын цагдаагийн газрын статистик мэдээллээр хүчирхийллийн гэмт хэргийн түвшин 2023 оны оргил үеэс буурч, 2024 онд сүүлийн гучин жилийн хамгийн доод түвшинд хүрсэн байна. 2025 оны урьдчилсан дүнгээр мөн бууралт ажиглагдаж байгаа аж.

Дональд Трамп Нью-Йорк, Чикаго хотуудад ч цэрэг байрлуулна гэж мэдэгдсэн нь Иллинойс муж болон бусад Ардчилсан намын удирдагчдын хүчтэй эсэргүүцэлтэй тулгарлаа. Washington Post болон Schar сургуулийн хамтран хийсэн санал асуулгаар Вашингтон хотын иргэдийн 80 хувь нь цэрэг байрлуулах шийдвэрийг дэмжихгүй гэсэн үр дүн гарсан нь уг асуудал нийтийн дунд ч эргэлзээтэй хүлээж авагдаж буйг харуулж байна.

Эх сурвалж: BBC