Улсын Их Хурлын дэд дарга Х.Булгантуяа АНУ-ын Конгрессын Төлөөлөгчдийн танхимын гишүүн Эд Кейс, Ами Бера, Доктор Нил Данн, Сара Якобс, Жонатан Л.Жексон нарын төлөөлөгчдийг өнөөдөр хүлээн авч уулзлаа. Тэрбээр уулзалтын эхэнд АНУ нь Монгол Улсын чухал “гуравдагч хөрш”, стратегийн түнш гэдгийг тодотгож, ардчилал болон зах зээлийн эдийн засгийг тууштай дэмжиж ирсэнд талархал илэрхийлэв.

Х.Булгантуяа хоёр улсын харилцаа өндөр түвшний айлчлал болон олон талт механизмуудаар улам бэхжиж байгааг дурьдаад, United Airlines компанийн Токио-Улаанбаатар чиглэлд хийж буй нислэг, “Хариуцлагатай аялцгаая” кампанит ажлын ач холбогдлыг онцлов. Мөн цаашид эрчим хүч, стратегийн ач холбогдол бүхий ашигт малтмал, аялал жуулчлал, сансар судлал зэрэг салбарт хамтран ажиллах боломжийн талаар санал илэрхийлэв.

АНУ-ын Конгрессын гишүүн Эд Кейс Монголд хөрөнгө оруулалт нэмэгдүүлэх, судалгааны бүлэг байгуулахад дэмжлэг үзүүлэхээ мэдэгдэж, манай улсын парламент дахь эмэгтэй гишүүдийн хувь АНУ-аас дээгүүр байгааг онцлон үнэлжээ. Түүнчлэн парламентын ардчиллыг бэхжүүлэх чиглэлээр хамтран ажиллахад бэлэн гэдгээ илэрхийлсэн байна.

Уулзалтад мөн УИХ-ын гишүүн С.Эрдэнэболд, О.Саранчулуун, Ч.Анар, А.Ундраа нар оролцсон бөгөөд хоёр улс 1987 оны нэгдүгээр сарын 27-нд дипломат харилцаа тогтоосон гэдгийг УИХ-ын Хэвлэл мэдээллийн газар мэдээллээ.

Эх сурвалж: Улсын Их Хурлын Хэвлэл мэдээллийн газар