Дэлхийн тансаг автомашины зах зээлд онцгой байр суурь эзэлдэг Rolls-Royce компани цахилгаан Spectre купены Inspired by Primavera хэмээх хязгаарлагдмал цуврал загвараа олон нийтэд танилцууллаа. Итали хэлнээс primavera гэдэг нь “хавар” гэсэн утгатай бөгөөд уг цувралын загваруудыг тоорын цэцэглэлтийн гоо үзэсгэлэнд зориулжээ.
Цувралд гурван онцгой автомашин багтсан бөгөөд тэднийг Evanescent буюу “хором зуурын”, Reverie буюу “мөрөөдөл”, Blossom буюу “цэцэглэл” гэж нэрлэсэн байна. Машин бүр өөрийн өвөрмөц өнгө будалттай ч ижил онцлогийг хадгалсан нь загварын гайхамшгийг бүрдүүлжээ.
Дизайнерууд машины бүхээгийн дотор болон гадна хэсгийг нарийн хийцээр чимэглэсэн бөгөөд 23 инчийн онцгой диск нь хаврын наранд дэлбээлж буй тоорын цэцгийг санагдуулдаг.
Салоны дотор талд тоорын сэдэвтэй чимэглэлүүд байрлуулж, босго, толгойн түшлэг болон урд самбарыг хар модоор урласан бол дээврийн дотор талд одот тэнгэрийн хаврын өөрчлөлтийг харуулсан гэрэлтүүлгийг суурилуулжээ.
Rolls-Royce Spectre Primavera цуврал нь 585 морины хүчтэй цахилгаан мотортой бөгөөд 0-100 км/ц хурдыг 4.4 секундэд авна. 102 кВт·ц багтаамжтай литий-ион аккумулятор нь нэг удаагийн цэнэглэлтийн дараа 446 км зам туулах боломжийг олгож байна.
Захиалагч нар эдгээр онцгой загварыг ирэх хавар хүлээн авах ажээ.
Эх сурвалж: Автопилот, OfficeLife.media
