Боловсролын яам, Их сургуулиудын хөрөнгийн менежментийн төвөөс их сургуулиудын ректор, захирлуудын зөвлөлдөх уулзалтыг зохион байгуулж, багш, оюутны ажиллаж суралцах орчныг үе шаттайгаар сайжруулах зорилтыг дэвшүүлэв.
Уулзалтад Боловсролын яамны Санхүү, хөрөнгө оруулалтын газрын дарга С.Должинсүрэн 2026 оны улсын төсөвт боловсролын салбарт тусгасан хөрөнгө оруулалт, хэрэгжүүлэх төслүүдийн талаар танилцуулсан бол МУИС-ийн ректор Б.Очирхуяг спорт комплекс, мянган оюутны дотуур байр, дадлагын бааз зэрэг бүтээн байгуулалтыг хамтын санхүүжилтээр хэрэгжүүлэх боломжийн талаар мэдээлэл хийлээ. Мөн яамны Дээд боловсролын газрын төлөөлөл шинэ хичээлийн жилийн бодлого, тэтгэлэг, зээлийн зохицуулалт, сургалтын байгууллагын ангиллын талаар товч мэдээлэл өгсөн байна.
Зөвлөлдөх уулзалтаар оюутны элсэлтийн бодлого, их өгөгдөлд суурилсан хиймэл оюун ухаан нэвтрүүлэх, сургууль дундын менежментийг өргөжүүлэх зэрэг олон санал санаачилгыг хэлэлцсэн юм.
Боловсролын яамны мэдээлснээр өнөөдрийн байдлаар төрийн өмчийн их сургуулиудад нийт 74 мянга 473 оюутан, 3060 багш ажиллаж байна.
Эх сурвалж: Боловсролын яам
