Ираны цөмийн хөтөлбөртэй холбоотойгоор Европын гурван улс болох Их Британи, Франц, Герман улсууд НҮБ-ын хориг арга хэмжээнүүдийг дахин сэргээх алхмыг эхлүүлсэн тухай NHK мэдээлэв. Эдгээр улсууд Тегераныг АНУ-тай байгуулсан цөмийн хэлэлцээрээ сэргээхийг удаа дараа уриалж ирсэн бөгөөд наймдугаар сарын эцэс хүртэл дипломат аргаар зөвшөөрөхгүй бол хориг арга хэмжээг сэргээхэд бэлэн байгаагаа анхааруулжээ.
Хамтарсан мэдэгдэлдээ тэд Ираны тал хэлэлцээрийн заалтуудыг зөрчиж буйг НҮБ-ын Аюулгүйн Зөвлөлд мэдээлсэн бөгөөд Ираны өндөр хувиар баяжуулсан ураны нөөц нь “иргэний зориулалтаар ашиглахад эргэлзээтэй” гэж дүгнэсэн байна. Тиймээс Ираны цөмийн хөтөлбөр олон улсын энх тайван, аюулгүй байдалд бодит аюул заналхийлэл болж байгааг онцолжээ.
Үүний хариуд Ираны Гадаад хэргийн яам Европын гурван улсын “хууль бус мэдэгдэл”-ийг эрс няцаан буруушаасан бол Ираныг дэмжигч орнууд хоригийг сэргээхийн эсрэг байр суурь илэрхийлэв. ОХУ-ын НҮБ дахь төлөөлөгчийн орлогч Дмитрий Полянскийгийн мэдээлснээр, Орос болон Хятад хоёр улс асуудлыг дипломат замаар шийдвэрлэхийн тулд зургаан сарын хэлэлцээ хийх тогтоолын төслийг өргөн барьжээ. Харин Аюулгүйн Зөвлөл 30 хоногийн дотор хоригийг сэргээхийн эсрэг санал гаргахгүй бол НҮБ-ын хориг арга хэмжээнүүд албан ёсоор дахин хэрэгжих юм байна.
Эх сурвалж: NHK
