Улсын хэмжээнд 2025 оны зургаадугаар сарын 20-ны өдрийн байдлаар улаанбурхан өвчний 8648 тохиолдол бүртгэгдсэн талаар Халдварт өвчин судлалын үндэсний төвөөс мэдээллээ. Үүний 90 орчим хувь нь эдгэрсэн ч долоон хүн нас барсан байна. Нас барагсдын тав нь вакцин хийлгэх насанд хүрээгүй хүүхэд байсан бол хоёр нь огт дархлаажуулалтад хамрагдаагүй байжээ.
Халдварын улмаас 691 хүн эмнэлэгт, 1154 хүн гэрээр эмчлүүлж байгаа бөгөөд сүүлийн хоногт 193 шинэ тохиолдол бүртгэгдсэн нь халдварын тархалт бүрэн хумигдаагүйг харуулж байна. ХӨСҮТ-ийн ерөнхий захирал Э.Анхбаярын мэдээлснээр, эмнэлгийн орны 86 хувийг ашиглалтад оруулсан бөгөөд хүнд хэлбэрийн өвчтөнүүдийг эмнэлэгт, хөнгөн хэлбэрийнхнийг гэрээр эмчилж буй аж.
Тэрбээр мөн “Халдварын голомт ерөнхий боловсролын сургуулиудад байгаа. Гэсэн ч хичээл амарсантай холбоотойгоор өвчлөл буурах хандлагатай байна. Гэрээр эмчлүүлж буй иргэдийг дүүргийн эмнэлэг, өрхийн эмчийн хяналтад авч, эмчилгээ хийгдэж байна” хэмээн мэдээллээ.
Дархлаажуулалтыг дүүргийн эмнэлгүүдэд оройн 22:00 цаг хүртэл, ХӨСҮТ-д шөнийн 24:00 цаг хүртэл хийж буй бөгөөд улаанбурхан нь вакцинжуулалтаар бүрэн урьдчилан сэргийлэх боломжтой халдвар гэдгийг онцлон дурдсан юм. Иймд иргэдийг дархлаажуулалтад идэвхтэй хамрагдахыг уриалжээ.
Эх сурвалж: ХӨСҮТ.
