Дэлхийн өвийн хорооны 48 дугаар чуулган БНСУ-ын Пусан хотноо 2026 оны 07 дугаар сарын 19-29-ний өдрүүдэд боллоо.
2025 оны Дэлхийн өвийн хорооны ээлжит чуулганаар Монгол Улсаас Дэлхийн байгалийн өвд нэр дэвшүүлсэн “Дорнод Монголын хээр тал” өвийн номинацийг авч хэлэлцэн тодорхой үүрэг даалгавар бүхий зөвлөмжийг өгч 47COM 8B.5 шийдвэр батлагдсан.
Тус шийдвэрийн хэрэгжилтийг хангах ажлын мөрөөр Олон Улсын байгаль хамгаалах холбооны төлөөлөгч нартай БОУАӨЯ-ны ТХГНБГ-ын дарга Ц.Уранчимэг, БОУАӨ-ийн сайдын Дэлхийн өвийн асуудал хариуцсан зөвлөх бөгөөд Байгалийн өвийн үндэсний шинжээч Б.Чимэд-Очир, П.Ганхуяг, ЮНЕСКО-гийн Монголын үндэсний комиссын Ерөнхий нарийн бичгийн даргын орлогч С.Уянга нар уулзалт хийж өвийн газрын хадгалалт, хамгаалалтын чиглэлээр авч хэрэгжүүлж буй арга хэмжээ, цаашид хэрэгжүүлэх үйл ажиллагааны талаар санал солилцлоо.
Монгол Улсаас Дэлхийн өвийн урьдчилсан жагсаалтад 2014 онд бүртгүүлсэн “Монголын говь” өвийн газрын нэр дэвшүүлэлтийн асуудлыг мөн хэлэлцэв. Тус өвийн газрын номинацийн материалыг Дэлхийн өвийн төвөөс бүрэн гүйцэтгэж үзсэн бөгөөд нэр дэвшүүлэлтийн хүрээнд Олон Улсын байгаль хамгаалах холбооны шинжээчдийн баг 2026 оны 09 дүгээр сард өвийн газар дээрх техникийн үнэлгээ хийхээр төлөвлөж байна.
Мөн чуулганы үеэр “Synergies between Tangible and Intangible Heritage” Олон Улсын хэлэлцүүлэгт Монгол Улсаас Хан Хэнтийн УТХГН-ийн Хамгаалалтын захиргааны дарга Б.Хашмаргад оролцлоо. Тэрээр Бурхан Халдун уул, түүнийг хүрээлсэн тахилгат газар нутаг болон уул, овоо тахих уламжлалт зан үйлийн өвийн хамгаалалтын нэгдсэн менежмент, хэрэгжилтийн туршлагыг олон улсын судлаач, шинжээчдэд танилцуулсан юм.
Энэхүү илтгэл нь 2025 онд ЮНЕСКО-гийн Бээжин дэх бүсийн төлөөлөгчийн газар болон Зүүн Азийн II зэрэглэлийн төвүүдээс шалгаруулсан олон улсын кейс судалгаанд үндэслэсэн бөгөөд Бурхан Халдуны хамгаалалтын туршлага нь биет болон биет бус өвийн уялдаа холбоог харуулсан Зүүн хойд Азийн шилдэг кейсийн нэгээр үнэлэгдэв. Мөн ЮНЕСКО-гийн нэгдсэн менежментийн арга зүй боловсруулах суурь жишээний нэгээр сонгогджээ.
