Японы Sony Group корпорацийн хиймэл оюун ухааны салбарын судлаачдын баг туршлагатай ширээний теннисчидтэй эн тэнцүү тоглож, тэднийг хожих чадвартай хиймэл оюун бүхий робот зохион бүтээснээ зарлалаа. Энэ тухай Киодо агентлаг мэдээлснээс эш татан Kazinform дамжууллаа.
Sony AI компанид зохион бүтээсэн автономит ажиллагаатай Ace робот нь 8 үелсэн гартай бөгөөд ширээг тойруулан байрлуулсан хэд хэдэн камер нь бөмбөгний хэт хурдан хөдөлгөөнийг хянадаг байна. Роботын бүх хөдөлгөөнийг хиймэл оюунаар удирддаг тухай Их Британийн Nature гэдэг шинжлэх ухааны сэтгүүлд бичжээ.
Ace робот 10 гаруй жилийн туршлага бүхий 5 теннисчинтэй тоглохдоо гурвыг нь хожсон ба хоёр мэргэжлийн тамирчинд хожигдсон байна. Гэхдээ 7 геймээс нэгд нь хожжээ. Олон улсын ширээний теннисний холбооны дүрмийн дагуу явагдсан тоглолтын үеэр уг төхөөрөмж янз бүрийн эргүүлэгтэй давуулалт, цохилтуудыг амжилттай хааж, цохисны дараа торонд тээглэн унаж, чиглэлээ өөрчилсөн бөмбөгийг эргүүлэн давуулж байв.
Дээрх сэтгүүлд дүгнэн бичсэнээр, хиймэл оюун ухааны систем нь биеийн хүчний интерактив тоглолтонд нь хүнээс давж гарах боломжтой гэдгийг Ace робот анх удаа харууллаа. Уг робот ширээний теннист амжилт гаргасан нь хиймэл оюуны технологийг үйлдвэрлэл, үйлчилгээний робот техник бүтээхэд ашиглах хэтийн төлвийг нээж байна.
