Лхагва гарагт Хорватын багийг 4:2-оор хожсон тоглолтод Харри Кэйн хоёр гоол оруулж, Гари Линекерийн Английн шигшээ багийн төлөө ДАШТ-д оруулсан гоолын дээд амжилттай эн зэрэгцсэн нь тус багийн ахлагч энэ удаагийн тэмцээнд онцгой эрч хүчтэй оролцож байгааг харууллаа.

Английн багаас Харри Кейн тоглолтын 12 болон 42 дахь минутад, Жуд Беллингем 47 дахь минутад, Маркус Рэшфорд 85 дахь минутад тус тус гоол орууллаа. Харин Хорватын багаас Мартин Батурина 36 дахь минутад, Петар Муса 45+5 дахь минутад гоолдож, тооны харьцааг ойртуулав.

Гэсэн хэдий ч дасгалжуулагч Английн шигшээ багийн хамгаалалт ердийнхөөс сул байсан нь дасгалжуулагч Томас Тухелийн хувьд санаа зовоосон асуудал байлаа. Ялангуяа эхний үед Английн баг хоёр ч удаа гоол алдаж, Хорватуудад тооны харьцааг тэнцүүлэх боломж олгосон юм.

Х.Кейн өнгөрсөн улиралд “Бавари Мюнхен” клубийн төлөө бүх тэмцээнд 61 гоол (үүний 14-ийг нь Аваргуудын лигт) оруулсан бөгөөд Бундеслигийн шилдэг мэргэн буучийн шагналыг гурав дахь жилдээ дараалан хүртсэн юм. Бундеслигт тоглосон эхний гурван улиралдаа ийм амжилт гаргасан өөр нэг ч тоглогч байдаггүй.

“Тоттенхэм Хотспур” клубийн довтлогч асан тэрбээр Техас муж улсын Арлингтон хотноо Хорватын багтай тоглохдоо энэхүү эрчээ алдаагүй боловч эхний гоолоо оруулахын тулд торгуулийн цохилтыг дахин гүйцэтгэх шаардлага гарчээ. Учир нь түүний эхний цохилтыг хаалгач хаасан байна.

Харин түүний хоёр дахь гоол нь Хорватын хамгаалалтын алдааны ачаар тун хялбархан орсон юм. Тодруулбал, торгуулийн талбайд түүнийг хамгаалалгүй орхисны улмаас Х.Кейн мөргөж, өөрийн болон Английн шигшээ багийн хоёр дахь гоолыг оруулжээ.

Эх сурвалж: Reuters