Япон Улсад оршин суугаа монгол хүүхэд багачуудад эх хэл, үндэсний өв соёл, ёс заншил, түүх уламжлалаа өвлүүлэн сургах үүргийг хэрэгжүүлж ирсэн “Миний Монгол” сургууль үүсэн байгуулагдсаныхаа 10 жилийн ойн баярыг тус ЭСЯ-нд тэмдэглэв.

Консулын хэлтсийн дарга бөгөөд Зөвлөх Л.Даваажаргал ойн баярыг нээж үг хэлэв. Тэрбээр хэлсэн үгэндээ, “Япон Улсад 21 мянга гаруй Монгол Улсын иргэн оршин сууж байгаагийн дотор таван мянга гаруй хүүхэд өсөж хүмүүжиж байна. Дэлхийн аль ч өнцөгт амьдарч байгаа хүүхэд бүрийн зүрх сэтгэлд Монгол орноо гэсэн хайр, монгол хүн гэдгээрээ бахархах бахархлыг төлөвшүүлэх, монгол хүүхдүүдийг эх хэлээрээ ярьж, монгол ахуй, өв соёл, үндэсний үнэт зүйлээ мэддэг монгол хүн, Монгол Улсын иргэн болон төлөвшүүлэх нь төр болон иргэдийн хамтын үүрэг хариуцлага, зорилго болж билээ.

Энэхүү зорилгыг хэрэгжүүлэх үйлсэд “Миний Монгол” сургууль 2016 оноос хойш өнгөрсөн арван жилийн хугацаанд хувь нэмрээ оруулж, Токио, Чиба, Сайтама, Цүкүба зэрэг бүс нутагт салбар сургуулиа байгуулж, Япон Улсад өсөж торниж буй олон арван хүүхдийг хамарсан танхимын болон цахим сургалтыг явуулж, сургалтын өөрийн онцлог бүхий арга барил, хөтөлбөр боловсруулан нутагшуулж, эх хэл, түүх соёл, ёс заншлаа өвлүүлэх үйлсэд хүчин зүтгэж ирсэнд талархаж байна” гэв.

Япон Улсад суугаа Онц бөгөөд Бүрэн эрхт Элчин сайдын талархлын бичгийг “Миний монгол” сургуулийн захирал Б.Наранхүү, Боловсролын тэргүүний ажилтан, багш Б.Дэнсмаа, З.Бүжин, Ж.Аззаяа, Эцэг эхчүүдийн зөвлөлийн дарга Ч.Дэжээхүү болон сургуулийн захиргаанд тус тус гардуулж, баяр хүргэв.

Мөн үеэр хүүхдүүд өөрсдийн сурсан дуу шүлэг, ардын бүжгээс сонирхуулж, морин хуур, ятга хөгжмийн бүтээлээс хөгжимдөж, хүрэлцэн ирсэн зочдод бэлэг барив гэж тус улсад суугаа ЭСЯ-наас мэдээллээ.