Улсын Их Хурлын чуулганы өнөөдрийн нэгдсэн хуралдаанаар стратегийн ач холбогдол бүхий бүтээгдэхүүний хангамж, нийлүүлэлтийг дэмжих тухай хуулийн төслийг эцэслэн баталлаа. Уг хууль нь олон улсын худалдааны нөхцөл байдал болон гадаад орчны нөлөөллөөс үүдэж болзошгүй эрсдэлийг бууруулах, стратегийн ач холбогдол бүхий бүтээгдэхүүний тасралтгүй хангамжийг хангах, шаардлагатай үед шийдвэрийг шуурхай гаргах эрх зүйн орчныг бүрдүүлэх зорилготой юм.
Хуулиар газрын тосны бүтээгдэхүүн импортлогч аж ахуйн нэгжүүд шатахууны хангамжийн тогтвортой байдлыг хангахад шаардлагатай нөөцийг бүрдүүлэх, Монгол Улсын газрын тосны бүтээгдэхүүний дор хаяж нэг сарын буюу гуч хоногийн хэрэглээний нөөцийг хадгалах агуулах барихад чиглэсэн хөнгөлөлттэй санхүүжилт олгох асуудлыг зохицуулж байна. Ингэснээр шатахууны хомсдол үүсэх эрсдэлээс урьдчилан сэргийлэх, нийлүүлэлтийн тогтвортой байдлыг дунд болон урт хугацаанд хангах боломж бүрдэх юм.
Тус хуулийн төслийг нэгдсэн хуралдаанд оролцсон ерэн хоёр гишүүний жаран ес нь дэмжсэн саналаар баталсан байна.
Эх сурвалж: Улсын Их Хурал
