Улсын Их Хурлын гишүүн О.Амгаланбаатар болон нэр бүхий гишүүд Үндэсний их баяр наадмын тухай хуульд нэмэлт, өөрчлөлт оруулах тухай болон энэ өөрчлөлттэй холбогдон Засаг захиргаа, нутаг дэвсгэрийн нэгж, түүний удирдлагын тухай хууль болон дагалдах хуулиудад өөрчлөлт оруулах хуулийн төслүүдийг өнөөдөр УИХ-ын дарга Н.Учралд өргөн мэдүүллээ.

Үндэсний баяр наадмын тухай хуульд допингийн зохицуулалтыг олон улсын шаардлагад нийцүүлэх шаардлагатайг хуулийн төсөл санаачлагчид онцлов. Одоогийн хуульд допингийг хориглосон заалт байгаа ч хяналт, хариуцлагын механизм нь олон улсын стандартад нийцээгүйгээс шүүх дээр салбар хороодын шийдвэрүүд хүчингүй болох тохиолдол гарч байгаа аж. Иймээс бөх, морь, сур харваа зэрэг төрлүүдэд улсын цолыг шинжилгээний хариу гарсны дараа олгодог байх зохицуулалт тусгагджээ.

Мөн хурдан морь унадаг хүүхдийн эрх, аюулгүй байдлыг хангах асуудлыг бодлогоор дэмжихээр тусгасан байна. Хүүхдийн амь нас, эрүүл мэндийн эрсдэлийг бууруулахын зэрэгцээ унаач хүүхдийн хөдөлмөрийг үнэлж, улс, аймаг, сумын шилдэг унаач цол олгох эрх зүйн боломжийг хуульд нэмэхээр тусгажээ.

Харин Засаг захиргаа, нутаг дэвсгэрийн нэгжийн тухай хуультай холбоотой өөрчлөлтөд төрийн чиг үүргийг хэрэгжүүлдэг агентлагуудын орон нутаг дахь байгууллагын удирдлага, захирлыг томилох, чөлөөлөх эрхийг аймгийн Засаг даргад олгохоор тусгасан байна. Энэ нь орон нутгийн удирдлагын бие даасан байдлыг нэмэгдүүлэх, нутгийн хэрэгцээнд нийцсэн удирдлагын тогтолцоог төлөвшүүлэх ач холбогдолтой гэж үзжээ.

Мөн Монгол Улсын Засгийн газрын хоёр мянга хорин тавдугаар оны нэгдүгээр сарын хорин есний өдрийн гурван зуун долоон дугаар тогтоолоор аймгийн Засаг даргын эрхлэх асуудлын хүрээнд хорин зургаан газар, хэлтсийг тогтоосон болохыг УИХ-ын Хэвлэл мэдээллийн газар мэдээлэв.