Монгол Улсад хүчин төгөлдөр мөрдөгдөж буй Гэр бүлийн тухай хууль 1999 онд батлагдсан бөгөөд 26 жилийн хугацаанд зарчмын шинэчлэл хийгдээгүй байна. Энэ хугацаанд найман удаа нэмэлт, өөрчлөлт орсон ч эдгээр нь гэр бүлийн харилцааны асуудлыг шийдвэрлэхээс илүүтэй бусад хуулийн өөрчлөлттэй уялдсан байв.

Нийгмийн харилцаа хувьсан өөрчлөгдөж буй өнөө үед гэрлэх, гэрлэлт цуцлах, хүүхдийн эрхийг хамгаалах, хууль ёсны ашиг сонирхлыг сэргээх зэрэг асуудлууд нэмэгдэж байгаа ч одоогийн хууль эдгээрийг нарийн зохицуулж чадахгүй байна. 2024 онд улсын хэмжээнд нийт 73,727 иргэний хэрэг шийдвэрлэгдсэнээс 3,538 нь Гэр бүлийн тухай хуулийн дагуу байсан нь нийт иргэний хэргийн 10 орчим хувийг эзэлжээ.

Мөн одоогийн хууль 2002 онд батлагдсан Иргэний хуулийн зарчим, үзэл баримтлалтай нийцэхгүй болж, олон улсын жишигт нийцэх зохицуулалт үгүйлэгдэж байгаа аж. Тиймээс шинэчилсэн найруулгын төсөлд гэр бүлийн гишүүдийн эрх ашгийг хамгаалах, хүүхдийн эрхийг илүү нарийн зохицуулах, гэр бүлийн маргааныг оновчтой шийдвэрлэх эрх зүйн шинэ орчныг бүрдүүлэх зорилт тавьжээ.

Эх сурвалж: Засгийн газрын хэвлэл мэдээллийн алба