Тэргүүн шадар сайд Н.Учралын ахалж буй “Экспортыг нэмэгдүүлж, импортыг дэмжих” ажлын хэсгийн санал, судалгааны үр дүнд гаалийн хяналтын журмыг шинэчлэн цахимжууллаа. Энэхүү шинэчлэлд 18 мянга гаруй иргэн, аж ахуйн нэгжийн саналд тулгуурлан нөхцөл байдлын үнэлгээ хийж, журамд тусгасан байна.

Шинэ журамд гаалийн байцаагчийн хяналт шалгалтын алхам бүр тодорхой хугацаатай болж, тээврийн хэрэгслийн шалгалт 1 цагийн дотор, гаалийн бүсээс гарах хүсэлтийг мөн 1 цагийн дотор шийдвэрлэх зохицуулалт оржээ. Мөн бараа бүрдүүлэлтийг 72 цагийн өмнө цахимаар хүргүүлэх боломжтой болсон нь цаг хугацааг хэмнэх, гаалийн ажил илүү хурдтай болох нөхцөлийг бүрдүүлж байна. Иргэн, аж ахуйн нэгжүүд өөрсдийн ачааны хяналтын явцыг давхар цахимаар хянах боломжтой болжээ.

Хуучин журмын 85 алхам, улсын ахлах байцаагчаас хамаарсан 55 үйлдлийг цөөрүүлж, цахимжуулснаар гаалийн ажилтны хувийн үзэмжээр шийдвэр гаргах явдал багасч, иргэдийн чирэгдэл арилна гэж үзэж байна.

Шинэчилсэн журмын гол өөрчлөлтүүдэд гаалийн мэдүүлгийг www.gaali.mn дахь CAIS системээр баталгаажуулах, улсын байцаагчийг автоматаар томилох, баримт бичгийг цахимаар илгээх, жингийн мэдээллийг системд шууд бүртгэх зэрэг шинэ зохицуулалтууд багтжээ. Мөн эрсдэлийн программаар тодорхойлогдсон бараанд хяналт тавих төлөвийг зөвхөн програмаар тогтоох зохицуулалт мөрдөгдөхөөр болсон байна.

ГЕГ энэхүү шинэчлэлийн талаар иргэд, аж ахуйн нэгжүүдийг тогтмол мэдээллээр хангаж ажиллахаар боллоо.