Монгол Улсын Их Хурлын 2025 оны долоодугаар сарын 9-ний өдрийн нэгдсэн чуулганаар Харьяатын тухай хуульд нэмэлт оруулах тухай хуулийн төслийг баталлаа.
Хуулийн 9 дүгээр зүйлийн 3 дахь хэсэгт оруулсан нэмэлт өөрчлөлтөөр, олимпын наадмын хөтөлбөрт багтах спортын төрөлд онцгой амжилт гаргасан буюу гаргах боломжтой гадаадын иргэнийг Монгол Улсын Ерөнхийлөгч хуульд заасан бусад нөхцөлийг үл харгалзан Монгол Улсын харьяат болгох боломжтой болж байна. Ингэснээр олон улсын нэр хүндтэй тамирчдыг Монголын нэрийн өмнөөс олимп, тив, дэлхийн уралдаан, тэмцээнд оролцуулах, мөн дотоодын тамирчид тэднээс мэдлэг, ур чадвар, туршлага хуваалцах шинэ боломж нээгдэнэ.
Үүнийг дагалдуулан Ажиллах хүчний шилжих хөдөлгөөний тухай хуульд нэмэлт оруулах тухай хуулийг баталж, боловсрол, шинжлэх ухаан, эрүүл мэнд, соёл, спортын байгууллагад гэрээгээр ажиллах гадаадын эмч, эрдэм шинжилгээний ажилтан, мэргэжлийн багш, дасгалжуулагчийг ажиллуулж буй ажил олгогчийг ажлын байрны төлбөрөөс чөлөөлөх зохицуулалтыг тусгалаа.
Эдгээр хуулийн өөрчлөлт нь Монгол Улсад спортын хүний нөөцийг шинэ түвшинд гаргах, олимпизмын хөдөлгөөнийг дэмжих, олимпын хөтөлбөрт багтсан спортын төрлийг хөгжүүлэх төрийн бодлоготой уялдаж байна.
Эх сурвалж: Монгол Улсын Их Хурал
Харьяатын тухай хуульд нэмэлт оруулах тухай
Ажиллах хүчний шилжих хөдөлгөөний тухай хуульд нэмэлт оруулах тухай
