Монголын Хуульчдын холбооны зөвлөлөөс энэ жилийн хуульчийн мэргэжлийн шалгалтыг 10 дахь удаагаа аравдугаар сарын 22-24-нд зохион байгуулахаар товложээ.
Уг шалгалтын бүртгэл https://burtgel.mglbar.mn/ хаягаар 45 хоногийн турш үргэлжилнэ. Бүртгэл маргаашаас эхэлж, есдүгээр сарын 21-ний өдрийн 00:00 цагт хаагдах юм. Энэхүү шалгалт хуульчийн мэргэжлийн үйл ажиллагаа эрхлэх зөвшөөрөл авахыг хүссэн этгээдийн шүүх эрх мэдлийг хэрэгжүүлэх, шүүн таслах ажиллагаанд оролцох, хууль зүйн туслалцаа үзүүлэх хангалттай мэдлэг, чадвар эзэмшсэн эсэхийг тогтоох зорилготой. Тус шалгалтад эрх зүйч мэргэжлээр бакалаврын боловсрол эзэмшиж, хоёр жилийн хугацаанд мэргэжлийн дадлага хийсэн хүмүүс оролцох эрхтэй байдаг ажээ.
Мөн шалгалтыг эрх зүйн ерөнхий мэдлэгийг сорьсон сорилгын болон эрх зүйн салбарын хүрээнд тодорхой тохиолдлыг хууль хэрэглэж шийдвэрлэх бодлогын шалгалтын хэлбэрээр зохион байгуулна. Шалгалтад оролцогчдод зориулсан бодлого бодох аргачлалын сургалт есдүгээр сарын 1-нээс аравдугаар сарын 4-нийг хүртэл 5 долоо хоног үргэлжлэх юм.
Ташрамд дурдахад, 2022 онд 1228 иргэн шалгалтад оролцсоноос 371 нь, 2023 онд 1200 иргэн шалгалтад оролцсоноос 203 нь, 2024 онд 1146 хүн шалгалт өгснөөс 205 нь тэнцэж, хуульчийн мэргэжлийн үйл ажиллагаа эрхлэх зөвшөөрөл авчээ.
