Байгаль орчин, уур амьсгалын өөрчлөлтийн сайд Б.Батбаатар өчигдөр “BirdLife International” байгууллагын гүйцэтгэх захирал Мартин Харпертай уулзаж, хамтын ажиллагааны санамж бичигт гарын үсэг зурлаа. Энэхүү санамж бичгийн зорилго нь Монгол Улсын биологийн олон янз байдал, шувууд, тэдгээрийн амьдрах орчин, нүүдлийн замыг цогцоор хамгаалах, олон улсын конвенцын хүрээнд хүлээсэн амлалтыг хэрэгжүүлэхэд дэмжлэг үзүүлэх, мөн уур амьсгалын өөрчлөлт, хүний үйл ажиллагааны сөрөг нөлөөллийг бууруулахад чиглэж байна.

Санамж бичгийн хүрээнд дараах чиглэлүүдээр хамтран ажиллахаар тохиролцжээ. Үүнд:

• Монгол Улсын нэгдэн орсон олон улсын гэрээ, конвенцын хэрэгжилтийг хамтран хангах

• нүүдлийн болон усны шувуудын хамгаалал, менежментийн төсөл, хөтөлбөрийг хамтран боловсруулах, хэрэгжүүлэх

• бүс нутгийн нүүдлийн замын санаачилга хөтөлбөр, биологийн олон янз байдлын түлхүүр нутгийг тодорхойлох, ус намгархаг газрын судалгаа, хамгаалал, нөхөн сэргээлтийн ажлыг дэмжих

• хөгжлийн томоохон төсөл, дэд бүтцийн бүтээн байгуулалтын үед байгальд ээлтэй төлөвлөлт, замын зураглал хийх, шаардлагатай арга зүйг хамтран боловсруулах, мэдээлэл солилцох

• олон улсын стандартыг нутагшуулах, онцгой ач холбогдол бүхий шувуудын хамгааллын төлөвлөгөө боловсруулах, улаан дансны үнэлгээг шинэчлэх, хамтарсан судалгаа, сургалт, боловсон хүчин бэлтгэх, техникийн туслалцаа үзүүлэх

• нүүдлийн шувуудын үржлийн үед нутгийн иргэдийг соён гэгээрүүлэх, сургалт зохион байгуулах, бүс нутгийн хамтын ажиллагааг бэхжүүлэх

Мөн хамтын ажиллагааны хүрээнд олон нийтийн ойлголтыг нэмэгдүүлэх, мониторингийн үр дүнг тогтмол танилцуулах, хамтарсан ажлын хэсэг байгуулан арга зүй, мэдлэг, олон улсын туршлага солилцох зэрэг үйл ажиллагаа хэрэгжүүлэхээр болсон талаар Байгаль орчин, уур амьсгалын өөрчлөлтийн яамнаас мэдээлэв.

Эх сурвалж: Байгаль орчин, уур амьсгалын өөрчлөлтийн яам