Нийслэл Улаанбаатар хотын 176 уулзвар, гарц, авто замыг иж бүрэн камержуулж, замын хөдөлгөөний болон олон нийтийн аюулгүй байдлыг хангах зорилгоор хиймэл оюун ухаанд суурилсан “Теле камерын нэгдсэн төв”-ийг өчигдөр албан ёсоор нээлээ. Энэхүү технологийн дэвшил нь авто замын түгжрэлийг бууруулах, зам тээврийн осол болон гэмт хэрэг, зөрчлөөс урьдчилан сэргийлэхэд чиглэсэн томоохон алхам болж байна.

Шинэ системийн хүрээнд одоогоор нийт 2606 камерыг ашиглан 10 төрлийн зөрчлийг хиймэл оюун ухаанаар илрүүлж, холбогдох иргэдэд шуурхай мэдээлэл хүргэх ажиллагааг эхлүүлээд байгаа юм. Ингэснээр тээврийн хэрэгслийн бодит цагийн хөдөлгөөн, дата мэдээлэл цугларч, гэрлэн дохио болон авто замын зохион байгуулалтыг илүү ухаалгаар удирдах нөхцөл бүрдсэн гэж Замын хөдөлгөөний удирдлагын төвийн захирал Ч.Хувьзаяа онцолжээ.

Төслийн талаар УИХ-ын гишүүн П.Сайнзориг “Улаанбаатарыг ухаалаг, бүтээмжтэй хот болгох эхлэл энэ систем болж байна. Энэ нь зөвхөн замын хөдөлгөөнийг сайжруулахаас гадна гэмт хэргийн илрүүлэлтийг нэмэгдүүлж, иргэдийн амар тайван амьдрах орчныг бүрдүүлнэ” хэмээн тэмдэглэв.

Өмнө нь нийслэл, дүүрэг, хороодын түвшинд хяналтын камерын системүүд нь хоорондоо уялдаа холбоогүй, нэгдсэн удирдлагагүй байсан. Харин “Теле камерын нэгдсэн төв”-ийг байгуулж, түүнтэй зэрэгцэн есөн дүүргийн Засаг даргын дэргэд дэд төвүүдийг байгуулснаар камерын мэдээллийг нэг дор төвлөрүүлэн хянах, төв болон дэд төвүүд хооронд мэдээлэл дамжуулах боломж бүрджээ.

Энэхүү системийн нэвтрэлтийг дагаад нийслэл хотын дотоод хяналт сайжирч, хуулийн хэрэгжилт, аюулгүй байдлын түвшин ахихыг холбогдох байгууллагууд найдаж байна.

Эх сурвалж: Замын хөдөлгөөний удирдлагын төв, Нийслэлийн засаг даргын тамгын газар.