Өнөөдөр Улсын Их Хурлын дарга Д.Амарбаясгаланд Улсын Их Хурлын гишүүд Б.Пүрэвдорж, М.Нарантуяа-Нара, Ч.Лодойсамбуу, Г.Уянгахишиг, А.Ундраа нар Нэмэгдсэн өртгийн албан татварын тухай хуульд өөрчлөлт оруулах тухай хуулийн төслийг өргөн барилаа.

Хуулийн төслийг санаачлах болсон үндэслэл

Бизнес эрхлэгчдэд татвар, зээл, түрээсийн дарамт их байгаа энэ цаг үед аж ахуйн нэгжийн орлогын албан татвар, нэмэгдсэн өртгийн албан татвар (НӨАТ), нийгмийн даатгалын шимтгэл зэрэг нь хүндрэл учруулж байгаа тул НӨАТ-ын хувь хэмжээг одоогийн 10 хувиас 5 хувь болгох хуулийн төслийг санаачлан боловсруулсан байна.

Одоогийн байдлаар аж ахуй нэгжүүдийн НӨАТ-ын өр 540 тэрбум төгрөгт хүрч, эдгээр хувийн хэвшлүүдийн дансыг хаах нөхцөл байдал үүссэн байгаа нь энэхүү өөрчлөлтийг хийх шаардлагатайг харуулж байна хэмээн хууль санаачлагчид онцоллоо.

Хүлээгдэж буй эерэг үр дүн

Манай улсын НӨАТ-ын орлого өсч, орлого цуглуулах чадвар нэмэгдэж байгаа хэдий ч үр дүнд нь инфляци, ажилгүйдлийн түвшин өсөх, ДНБ буурах эрсдэл үүсэж болзошгүй байгааг хууль санаачлагчид онцгойлон тэмдэглэв.

Иймд Нэмэгдсэн өртгийн албан татварын тухай хуулийн 11 дүгээр зүйлийн Албан татвар ногдуулах хувийн хэсгийн “11.1.Энэ хуулийн 7.1.1, 7.1.2-т заасан бараа, ажил, үйлчилгээний борлуулалтын үнэлгээнд 10 хувиар ногдуулна.” заалтын “… 10 хувиар ногдуулна.” гэснийг “… 5 хувиар ногдуулна” гэж өөрчлөх санал гаргажээ.

Хуулийн өөрчлөлт батлагдсанаар:

• Орлого цуглуулах чадварын үзүүлэлт сайжирна.
• Аж ахуй нэгжүүдийн үйл ажиллагаанд дэмжлэг болно.
• Татвар төлөгчдийн бааз нэмэгдэнэ.
• Эдийн засагт эерэг нөлөө үзүүлнэ.
• Улсын төсөвт цугларах татварын орлого нэмэгдэх боломжтой.

Энэхүү мэдээллийг Улсын Их Хурлын Хэвлэл мэдээллийн газраас танилцууллаа.