Үндэсний аудитын газраас өнөөдөр хэвлэл, мэдээллийн байгууллагын ажилтнууд, сэтгүүлчдэд зориулсан “Мэдлэг хуваалцах цаг” сургалт, хэлэлцүүлгийг зохион байгууллаа. Энэхүү арга хэмжээний үеэр Монгол Улсын Ерөнхий аудитор С.Магнайсүрэн төрийн аудитын байгууллагын үйл ажиллагаа, мэдээллийн ил тод байдлыг хангахад баримталж буй бодлогын талаар танилцуулсан юм.

Тэрбээр “Нийгэм, эдийн засаг тэлж, төсвийн хэмжээ нэмэгдэхийн хэрээр аудитын байгууллагын хяналтын үүрэг улам бүр нэмэгдэж байна. Тиймээс хиймэл оюун ухаан, дижитал шийдлийг нэвтрүүлж, цахим аудитын тогтолцоог бий болгохоор ажиллаж байна. Харин хэвлэл, мэдээллийн байгууллагын гол үүрэг бол нийгмийн гажуудлыг илрүүлэн шүүмжлэх, зөв чиглэлд хөтлөх явдал. Энэ утгаараа төрийн аудитын байгууллагын хяналт, сэтгүүлчдийн үүрэг харилцан уялдаатай, нэг зорилго руу чиглэдэг” хэмээн онцолсон байна.

Сургалтын хүрээнд сэтгүүлчдийн аудитын тайланг ойлгомжтой байдлаар нийтэд хүргэх арга зам, хамтын ажиллагааны боломжуудыг ч мөн хэлэлцэв. Аудитын үр дүнг иргэдэд илүү хүртээмжтэй хүргэх зорилгоор audit.mn сайтыг шинэчилж, ил тод байдлыг хангах гол платформ болгон хөгжүүлжээ.

Мөн Үндэсний аудитын газрын удирдлагууд сэтгүүлчдийн сонирхсон асуултад дэлгэрэнгүй хариулт өгч, хамтын ажиллагааг илүү үр дүнтэй болгоход чиглэсэн санал бодлоо солилцсон юм.

Эх сурвалж: Үндэсний аудитын газар