Улсын Их Хурлын 2025 оны зургаадугаар сарын 13-ны өдрийн чуулганы үдээс өмнөх нэгдсэн хуралдаанаар хоёр томоохон сэдвийг хэлэлцлээ. Эдгээр нь Хот байгуулалтын тухай хуулийн шинэчилсэн найруулгад нэмэлт оруулах, мөн Хууль тогтоомжийн тухай хуульд нэмэлт, өөрчлөлт оруулах төслүүд байв.

Хот байгуулалтын тухай хуулийн төслийг УИХ-ын гишүүн Ж.Алдаржавхлан танилцуулсан бөгөөд өнөөгийн хотжилтын эрэлт хэрэгцээнд нийцээгүй хууль тогтоомжийг шинэчлэх шаардлагын талаар тодорхой баримтаар хандан ярив. Тэрбээр Улаанбаатарын хотхонуудын жишээ болгон 16 мянган хүн амтай Алтай, 3500 сургуулийн насны хүүхэдтэй Эрин, Хархорин, мөн 5794 хүнтэй Кинг Тауер хотхонд сургууль, цэцэрлэг огт байхгүйг дурдлаа. Тиймээс хэсэгчилсэн төлөвлөлтийн шатнаас л оршин суугчдын тоо, хүүхдийн насны бүтцэд нийцүүлэн нийгмийн дэд бүтцийг төлөвлөх эрх зүйн орчныг бүрдүүлэх зорилготой хэмээн тайлбарлав.

Хуулийн төслүүдийн хэлэлцэх эсэхийг Эдийн засгийн байнгын хороо хэлэлцээд, олонхын саналтайгаар УИХ-ын нэгдсэн чуулганд оруулах нь зүйтэй гэж үзжээ. Гишүүд хуулийн хэрэгжилт, стандарт норм, хүний эрх, төсвийн тооцоо, хариуцлагын механизм зэрэг олон талаас асуулт асууж, санал өгсөн юм. УИХ-ын гишүүн С.Эрдэнэболд “иргэдийн амьдрах орчинд огцом, симуляци судалгаагүй шийдвэр гаргаж болохгүй” гэж онцолж, бодит үр дүнтэй, иргэдийн оролцоонд тулгуурлах ёстойг санууллаа.

Үүний дараа УИХ-ын гишүүн Д.Цогтбаатар нарын санаачилсан Хууль тогтоомжийн тухай хуульд нэмэлт, өөрчлөлт оруулах хуулийн төслүүдийн анхны хэлэлцүүлгийг хийв. Хууль зүйн байнгын хорооны танилцуулгыг гишүүн О.Номинчимэг уншиж танилцуулсан бөгөөд хүний эрхэд нөлөөлөх байдлыг урьдчилан үнэлэх, хууль тогтоомжийн төсөвт үзүүлэх нөлөөллийг тооцох, үндсэн зохицуулалтгүй дүрэм, журам, заавар, аргачлалыг хүчингүй болгох зэрэг зарчмын зөрүүтэй олон санал хэлэлцэгджээ.

УИХ-ын гишүүн П.Сайнзориг “хууль зүйт тогтолцоог хадгалах, хууль батлах процесст тогтвортой байдал хангах” хэрэгтэйг онцолж, эрх зүйн тогтолцоонд оочин цоочин байдлаар гарсан өөрчлөлт нь нийт хууль тогтоох бодлогод сөргөөр нөлөөлөхийг анхаарууллаа.

Чуулганы төгсгөлд хуралдааныг даргалсан УИХ-ын дэд дарга Б.Пүрэвдорж Монголбанкны Мөнгөний бодлогын зөвлөлийн тэтгэврийн зээлийн өр-орлогын харьцааг 50/50 болгох шийдвэр гаргасныг дуулгаж, уг шийдвэрийн үр дагаврыг судлан үзэх нь зүйтэйг дурдав. Мөн хэлэлцсэн асуудлуудын зарчмын зөрүүтэй саналын томьёоллуудын санал хураалтыг дараагийн хуралдаанд шилжүүлснээр нэгдсэн чуулганы хуралдаан өндөрлөв.

Эх сурвалж: Улсын Их Хурлын Хэвлэл мэдээллийн газар