Авто тээврийн хэрэгслийн албан татварын нэмэгдлийг цуцлах тухай иргэдийн өргөдлийг Улсын Их Хурлын Төсвийн байнгын хорооны хуралдаанаар хэлэлцэв. Уг өргөдөл олон нийтийн анхаарлыг татаж буйг харгалзан Нийслэлийн зүгээс байр сууриа илэрхийлсэн бөгөөд энэ талаар Нийслэлийн засаг даргын орлогч Т.Даваадалай дараах тайлбарыг өглөө.

Тэрбээр "Татвар багаслаа гэдэг нь иргэдэд урт хугацаандаа ашигтай бус" хэмээн онцолсон юм. Учир нь Улаанбаатар хотын автозамын нийт сүлжээ 1230 км бөгөөд эдгээр нь байнгын арчилгаа, засвар шаарддаг. Түүнийг шүдний өвчинтэй зүйрлэвэл, цаг тухайд нь эмчлэвэл хүндрэл багатай, зардал хэмнэлттэй байх боломжтой гэж тайлбарлалаа.

2023 оны байдлаар зөвхөн автомашины тэнхлэг тохиргоонд 500 гаруй тэрбум төгрөг зарцуулсан статистик байгаа аж. Энэ нь замын эвдрэл, тэгш бус байдлаас үүдэн тээврийн хэрэгсэлд үүсэж буй нэмэлт зардлын бодит жишээ гэлээ.

Түүнчлэн нийслэлийн авто замын 82 хувь нь өнөөдрийн байдлаар засвар үйлчилгээ шаардлагатай болсон бол, хэрэв яаралтай арга хэмжээ авахгүй бол энэ үзүүлэлт 95 хувьд хүрэх аюултай байгааг анхааруулсан юм.

Иймээс авто татварын нэмэгдэл зөвхөн төсөв бүрдүүлэх хэрэгсэл бус, нийтийн аюулгүй байдал, эдийн засгийн үр ашигтай уялдаатай гэж үзэж байгаагаа илэрхийлэв.

Эх сурвалж: Нийслэлийн Засаг даргын Тамгын газар.