2025 оны зургадугаар сарын 10-нд Улсын Их Хурлын Хөдөлмөрийн аюулгүй байдал, эрүүл ахуйн тухай хуулийн хэрэгжилттэй танилцаж, шаардлагатай бол хуулийн төсөл боловсруулах үүрэг бүхий ажлын хэсэг “Дулааны цахилгаан станц 3” ТӨХК-д ажиллалаа. Энэ үеэр станцын хөдөлмөрийн аюулгүй байдал, хүний нөөц, тоног төхөөрөмжийн нөхцөл байдал, саяхан гарсан ослын шалтгаан, үр дагавар зэрэгт дүгнэлт хийж, холбогдох албаныхнаас мэдээлэл сонсов.

Ажлын хэсгийн ахлагч, УИХ-ын гишүүн С.Эрдэнэбат ослын шалтгаан нь системийн доголдол, бодлогын түвшний анхаарал дутагдсаны үр дүн гэдгийг онцолж, хөдөлмөрийн аюулгүй байдлын зардлыг хэмнэлтийн нэрийн дор бууруулах нь ослын эрсдэлийг улам нэмэгдүүлж буйг тодотголоо. Тэрбээр Эрчим хүчний яамны хариуцлагын асуудлыг ч сөхөж тавилаа.

УИХ-ын гишүүн Б.Энхцэцэг, Б.Нарантуяа нар осолд өртөж амь насаа алдсан ажилтны ар гэрт эмгэнэл илэрхийлж, нөхөн төлбөр, дотоод хяналтын бодлого, хөдөлмөрийн нөхцлийг шинэчлэх шаардлагатайг тэмдэглэн, сэргээн босголтын ажилд шаардагдах тоног төхөөрөмжийг шуурхай хангах, тендерийг үндэсний аюулгүй байдлын зохицуулалтаар саадгүй явуулах эрх зүйн орчныг бүрдүүлэх ёстой гэсэн санал гаргав.

“ДЦС-3”-ын захирал Л.Эрхбаатар ослын талаар дэлгэрэнгүй мэдээлэл өгч, шалгалтын ажиллагаа үргэлжилж буйг хэлээд долдугаар машины цилиндрийн шинэчлэлийг 12-р сарын 1-ний дотор дуусгахаар төлөвлөж буйгаа танилцуулсан юм. Мөн 50 МВт-ын турбин, 25 МВт-ын генераторын нийлүүлэлтийг хугацаанд нь хийх шаардлагатай байгааг дурдав.

Хөдөлмөрийн аюулгүй байдлын хяналтын инженер Б.Наранцацрал сургалт, цэвэрлэгээ, зөрчил арилгах, хяналт тавих зэрэг бодит арга хэмжээний талаар тайлагнасан бол Үйлдвэрчний эвлэлийн хорооны дарга Ш.Энхсаран хөдөлмөрийн аюулгүй байдлыг хүний эрх, сэтгэлзүйн хамгаалалтын асуудалтай уялдуулан авч үзэхийг уриалж, тендерийн шалгуурт зөвхөн үнэ бус, чанар, стандарт, ажилчдын оролцоо зэргийг тусгах ёстойг онцоллоо. Мөн улс төрийн нөлөөлөл, ТУЗ-ийн бүрдэл, хуульд өөрчлөлт оруулах шаардлагын талаар байр сууриа илэрхийлэв.

Уулзалтын төгсгөлд УИХ-ын гишүүн С.Эрдэнэбат:

“Ослын талаар мэдээллийг нуун дарагдуулах, хэн нэгэн рүү нялзаах, хариуцлагаас зугтах байж болохгүй. Зөвхөн зааварчилгаа өгсөн, шалгасан гэх үндэслэлээр асуудлыг хаах бус бүх түвшний оролцогч талуудыг хамарсан нээлттэй хариуцлагын тогтолцоо шаардлагатай” хэмээн тэмдэглэжээ.

Мөн тэрбээр хөдөлмөрийн аюулгүй байдлын тухай хуулиас гадна Төрийн өмчийн хөрөнгөөр бараа, ажил, үйлчилгээ худалдан авах тухай хууль, Төсвийн хуульд нэмэлт, өөрчлөлт оруулах хэрэгцээ бий гэдгийг хэлэв. Эрсдэлийн зардлыг урьдчилан тооцож төсөвт тусгах, нөхөн төлбөрийг нэг удаагийн бус тогтвортой байдлаар зохицуулах шинэчлэл ч чухал гэдгийг онцолсон юм.

Цаашид ажлын хэсгээс эрчим хүч, тээвэр, уул уурхай зэрэг эрсдэл өндөртэй салбаруудад газар дээрх үнэлгээ хийж, холбогдох төрийн байгууллагуудтай хамтран салбар дамнасан хуулийн шинэчлэл, хамтарсан дүгнэлт гаргаж, УИХ-ын чуулганд танилцуулан эрх зүйн орчныг шинэчлэх санал өргөн барихаар төлөвлөжээ.

Эх сурвалж: Улсын Их Хурлын Хэвлэл мэдээллийн газар