Аж ахуйн нэгжийн орлогын албан татварын тухай хуульд орсон шинэ нэмэлт өөрчлөлтөөр, нийгмийн хариуцлагын хүрээнд хийсэн тодорхой төрлийн зардлыг албан татвараас хасах боломжтой болсон тухай Татварын ерөнхий газраас мэдээллээ. Хуулийн 22.9 дэх заалтад тусгаснаар, аж ахуйн нэгжийн орлого олох үндсэн үйл ажиллагаатай шууд хамааралгүй, нийгмийн зорилготой дараах бүтээн байгуулалт, санхүүгийн дэмжлэг, хандивын зардлыг татвар ногдох орлогоос хасч тооцох боломж бүрдэж байгаа юм.

Хөнгөлөлт үзүүлэх дээд хэмжээ нь тухайн жилийн татвар ногдох орлогын 1 хувь хүртэл байна. Энэ зохицуулалт 2024 оны наймдугаар сарын 30-ны өдрөөс хүчин төгөлдөр болж, 2035 оны нэгдүгээр сарын 1-нийг хүртэл мөрдөгдөнө.

Татвараас хөнгөлөх үйл ажиллагаа:

• Байгаль орчныг хамгаалах, нөхөн сэргээх, бохирдол бууруулах;

• Ахмад настан, хүүхэд, хөгжлийн бэрхшээлтэй иргэдийн нийгмийн хамгаалал;

• Соёлын өв, урлаг, музей, номын сан, бүтээлч үйлдвэрлэл;

• Нийтийн эзэмшлийн зам, талбай, ногоон байгууламж;

• Гамшгийн хохирол барагдуулах;

• Спортын хөгжил, олимпын тэмцээн зохион байгуулах;

• Оюутан, сурагчдын тэтгэлэг, сургалтын дэмжлэг;

• Төрийн болон орон нутгийн өмчийн боловсрол, эрүүл мэндийн байгууллагын үйл ажиллагаа;

• Мэдээллийн технологийн үйлдвэрлэлийг дэмжих виртуал бүсийн үйл ажиллагаа.

Хөнгөлөлт эдлэх хөрөнгө оруулалт, хандивт тавигдах шаардлага:

• Үндсэн хөрөнгөнд: Монгол Улсад байрлах, татвар төлөгчийн ашиг олох үндсэн үйл ажиллагаатай хамааралгүй байх, санхүүгийн тайланд бүртгэгдсэн байх, бусдад хөрөнгө оруулсан бол гэрээ, нотариатын баталгаатай байх;

• Санхүүгийн дэмжлэг, хандивт: Хариу төлбөргүй, харилцан хамааралгүй этгээдэд, зориулалт нь гэрээнд туссан, цахим төлбөрийн баримтаар баталгаажсан байх.

Хяналт, баталгаажуулалт:

Тус татварын хөнгөлөлт эдлэх бүтээн байгуулалт, төсөл, үйл ажиллагаанд тавигдах шаардлага, стандартыг дараах яамд тусгай тушаалаар баталсан. Үүнд:

• Шадар сайд (2025.02.05, №18)

• Зам, тээврийн сайд (2024.12.16, А/272)

• Байгаль орчин, уур амьсгалын сайд (2025.02.24, А/93)

• Соёл, спорт, аялал жуулчлал, залуучуудын сайд (2025.05.07, А/175)

• Цахим хөгжил, инновац, харилцаа холбооны сайд (2025.05.09, А/79)

• Гэр бүл, хөдөлмөр, нийгмийн хамгааллын сайд (2024.12.12, А/67)

• Эрүүл мэндийн сайд (2025.05.07, А/189)

Аж ахуйн нэгжүүд дээрх чиглэлд хөрөнгө оруулалт хийж, нийгмийн хариуцлагаа биелүүлснээр татварын хөнгөлөлт эдлэх боломж нээгдэж байгаа тул хуулийн зохицуулалтыг анхаарч, холбогдох шаардлагыг бүрэн хангасан тохиолдолд ашиглахыг зөвлөж байна.

Эх сурвалж: Татварын ерөнхий газар