Татварын хууль тогтоомжийг зөрчсөн, зөрчлөө хугацаанд нь арилгаагүй, эсвэл ижил төрлийн зөрчлийг гурав ба түүнээс олон удаа давтсан татвар төлөгчдийн мэдээллийг зөвшөөрөлгүйгээр олон нийтэд хүргэх зохицуулалт энэ оны хоёрдугаар сараас эхлэн хүчингүй болсон байна.

Уг зохицуулалт нь хүний нэр хүнд, нууцлалын эрхийг зөрчиж байна гэсэн Үндсэн хуулийн цэцийн дүгнэлтийн дагуу Татварын ерөнхий хуулийн 13.4 дэх хэсэгт өөрчлөлт оруулж, Улсын Их Хурал баталжээ. Шинэ зохицуулалтаар зөвхөн дараах хоёр тохиолдолд татвар төлөгчийн зөвшөөрөлгүйгээр мэдээллийг олон нийтэд түгээхийг зөвшөөрсөн байна:

1. Санхүүгийн баримтыг хуурамчаар үйлдсэн эсэх нь шалгагдаж байгаа бол

2. Эрэн сурвалжлагдаж байгаа татвар төлөгчийн тухай мэдээлэл

Эдгээр мэдээллийг зөвхөн Татварын албаны албан ёсны цахим хуудсанд жагсаалт байдлаар нийтлэх боломжтой. Гэвч ингэхээсээ өмнө тухайн татвар төлөгчид 10-аас доошгүй хоногийн өмнө урьдчилан мэдэгдэж, санал, тайлбар өгөх боломж олгох ёстой гэж хуульчилжээ.

Мөн дээрх үндэслэлээр олон нийтэд мэдээлэгдсэн боловч тухайн зөрчлийг арилгасан, оршин суугаа хаяг, байршил нь тодорхой болсон, эсвэл санхүүгийн баримтыг хуурамчаар үйлдсэн нь тогтоогдоогүй тохиолдолд жагсаалтаас хасах үүрэгтэй юм.

Ингэснээр татварын байгууллагын зүгээс татвар төлөгчийн хувийн мэдээллийг бусдад задруулах нь хориглогдож, хүний эрх, нэр төр, хууль ёсны ашиг сонирхлыг хамгаалах чиглэлд чухал өөрчлөлт болсон хэмээн хууль тогтоогчид үзэж байна.