Улс төрийн таван нам, эвслийн төлөөллөөс бүрдсэн 126 гишүүнтэй шинэ парламент “хүн төвтэй хууль, эрх зүйн орчныг бүрдүүлэх” стратегийн хүрээнд эрх зүйн шинэчлэлийг эхлүүлээд байна. Энэ ажлын нэг хэсэг болгон 2024 оны намрын чуулганаар Цагдаагийн албаны тухай хуульд өөрчлөлт оруулжээ.
Өмнө нь гэмт хэрэг, зөрчилд сэжиглэгдэж буй иргэнийг түр хугацаагаар саатуулахдаа түүнийг саатуулах байранд хүргэсэн цагаас эхлэн зургаан цаг хүртэл саатуулах зохицуулалт үйлчилж байсан. Харин энэ хугацааг иргэн цагдаагийн мэдэлд очсон буюу анх саатуулагдсан цагаас эхлэн тооцохоор өөрчилсөн байна. Энэ нь хүний халдашгүй, чөлөөтэй байх эрхийг илүү хамгаалсан шийдвэр хэмээн үзэж байна.
Үндсэн хуулийн Цэц энэхүү заалтыг хянаж үзээд, Монгол Улсын Үндсэн хуулийн Арван зургадугаар зүйлийн 13 дахь заалтыг зөрчиж байна гэж дүгнэжээ. Учир нь тус заалтад “Хүний халдашгүй, чөлөөтэй байх эрхтэй. Хуульд заасан үндэслэл, журмаас гадуур хэнийг ч нэгжих, баривчлах, хорих, мөрдөн мөшгих, эрх чөлөөг нь хязгаарлахыг хориглоно” хэмээн тодорхой тусгасан байдаг.
Шинэ зохицуулалт ийнхүү хэрэгжиж эхэлснээр цагдаагийн байгууллага сэжигтэн этгээдийг түр саатуулахдаа илүү нарийн хууль зүйн үндэслэлтэй ажиллах, иргэний үндсэн эрхийг хүндэтгэх шаардлагад нийцүүлсэн зохион байгуулалттай болох хүлээлттэй байна.
