2015 онд ашиглалтад орсон Өвөр гүнтийн авто замд өнөөдрийг хүртэл зөвхөн нөхөөс засвар хийж байсан бол, иргэдийн санал хүсэлтийн дагуу нийслэлийн Замын хөгжлийн газраас 4.5 км замын иж бүрэн шинэчлэлтийн ажлыг эхлүүлжээ. Тус ажлыг “Фючер Прогресс” ХХК гүйцэтгэж байна.

Шинэчлэлтийн хүрээнд:

• 30 см цементээр бэхжүүлсэн буталсан чулуун суурь,

• 5 см зузаантай өнгөн хучилт хийнэ.

• Зорчих хэсгийн баруун талаар дугуйн зам, зүүн талд явган хүний зам шинээр барина.

• Ус зайлуулах хоолойг замын налуу хэсэгт шийдэж, авто замаас доош 10 см гүн зургаан байршилд хоолой гаргана.

• Замыг гурван хэсэгт хуваан хэсэгчлэн хааж ажиллана. Цементэн суурь 48 цаг бэхжих хугацаанд түр зам гаргаж, хөдөлгөөнийг зохицуулна.

• Шуудууг дахин шинээр барьж, орц, гарц бүр дээр 500–700 метрийн урт ус зайлуулах хоолой хийнэ.

“Фючер Прогресс” ХХК-ийн ерөнхий инженер Б.Батбаяр хэлэхдээ, эвдэрсэн хэсгүүдийг шинэчилж, хашлагуудыг солино. Мөн ус зайлуулах хоолойн бөглөрлийг арилгаж, уулын шуудуу гаргана гэв.

НЗХГ-ын Засвар арчлалтын хяналтын хэлтсийн дарга О.Энхбаатар-ын тайлбарласнаар, замын эвдрэл үүссэн гол шалтгаан нь замбараагүй орц, гарц гаргаж, шуудууг эвдсэнээс үүдсэн ус тогтдог байдал байжээ. Иймд шинэчлэлтийн хүрээнд 7 метр өргөн замыг цементээр бэхжүүлж, хоёр талаар нь 1.5 метр өргөнтэй явган болон дугуйн замыг асфальт бетоноор хучна.

Нийслэлд энэ онд:

• 41 байршилд авто замын шинэчлэл, засварын ажил хийгдэж байгаа бөгөөд,

• Үүнээс 33 нь он дамжих ажил, 8 нь шинээр барих зам юм.

Саяхан дууссан ажлуудаас:

• Гранд Плазагийн уулзвараас 25 дугаар эмийн сангийн зам засвар дууссан.

• Цаашид Гранд Плазагийн уулзвараас Баруун 4 зам, Денверийн гудамж, Чингисийн өргөн чөлөө, Их тойруу зэрэг замуудад засвар үргэлжилнэ.

Зам засварын ажил нь улирлын онцлогоос шалтгаалан богино хугацаанд хийгддэг тул хөдөлгөөний түр хязгаарлалт зайлшгүй шаардлагатай болдог. Тиймээс иргэдийг хүлээцтэй хандаж, мэдээллийг ойрхон авахыг нийслэлийн Замын хөгжлийн газрын дарга Б.Одбаяр уриаллаа.

Эх сурвалж: НЗДТГ-ын Хэвлэл мэдээлэл, олон нийттэй харилцах хэлтэс