Эхлээд Ираны эсрэг цэргийн ажиллагааг дуусгасны дараа бид Кубын талаарх үйл ажиллагааны чиглэлийг боловсруулахаар төлөвлөж байна гэж Америкийн ерөнхийлөгч Д.Трамп өчигдөр мэдэгдлээ.

Цагаан ордонд болсон ёслолын үеэр тэрбээр Төрийн нарийн бичгийн дарга Марко Рубиод хандан хэлэхдээ “Марко чи маш гайхамшигтай ажиллаж байгаа шүү, одоо Кубын асуудлаар гайхамшигтай ажиллана хэмээн найдаж байна” гэжээ.

“Чи бусад хүмүүсийн хамт Кубад эргэн очих нь зөвхөн цаг хугацааны л асуудал. Гэхдээ тэнд үлдэхийн тулд явахгүй гэж найдъя. Чамайг буцаж ирээсэй гэж бид хүсэж байна” гэж Трамп куба гаралтай Рубиод хандан хэлсэн байна. Үүний сацуу Венесуэл дэх ажил хэрэг маш сайн явагдаж байгаа гэдэгт итгэлтэй байгаагаа илэрхийллээ. “Тэнд нөхцөл байдал тогтворжсон, гайхамшигтай ерөнхийлөгч Делси Родригес болон түүний хүрээнийхэн бидэнтэй хамтран гайхамшигтай сайн ажиллаж байгаа” гэж АНУ-ын Ерөнхийлөгч хэлсэн байна.

“Бид Венесуэлээс олон зуун сая баррель газрын тосыг хүлээн авч, Хьюстон болон бусад газар руу боловсруулахаар илгээж байна. Венесуэлчүүдийн олон жилийн хугацаанд олсон мөнгөнөөс илүү их мөнгийг бид тэдэнд өгч байна” гэж Трамп нэмж хэллээ.

Эх сурвалжуудаа эш татан The Atlantic сэтгүүлд бичсэнээр, АНУ-ын удирдлага Кубын эсрэг цэргийн ажиллагаа явуулах боломжийг судалж байгаа ажээ. Учир нь, Венесуэл, Ираны эсрэг ажиллагаанууд нь хүссэн үр дүнд хүрсэн гэж Вашингтон үзэж байгаа бололтой.

Эх сурвалж: ТАСС