Украинтай хийж буй дайнд Москваг дэмжихийн тулд Умард Солонгосоос ОХУ руу сум зэвсэг зэрэг цэргийн зориулалттай бүтээгдэхүүн бүхий 33 мянга орчим чингэлэг илгээсэн гэж Өмнөд Солонгосын цэргийн тагнуулын байгууллага өчигдөр мэдээлжээ.
БНСУ-ын Батлан хамгаалах яамны дэргэдэх Тагнуулын газраас сөрөг хүчний "Ардын хүч" намын гишүүн Кан Дэ Шикт хүргүүлсэн тайланд дурдсанаар, Пёньянаас илгээсэн эдгээр чингэлгээр 152 мм-ийн их бууны 15 сая гаруй ширхэг сум илгээсэн байж болзошгүй байна.
Тагнуулынхны энэхүү дүгнэлт нь өнгөрсөн оны долоодугаар сард мэдээлж байсан 28 мянган чингэлэгтэй харьцуулахад ОХУ-д нийлүүлсэн цэргийн тусламжийн хэмжээ мэдэгдэхүйц нэмэгдсэнийг илтгэж байгаа юм. Мэдээллээс үзэхэд, Умард Солонгос чингэлгийг далайн замаар тээвэрлэхдээ ихэвчлэн Оросын хилээс холгүй орших Ражин боомтыг ашиглаж байсан байна.
Мөн 2024 оны аравдугаар сараас хойш нийт 16 мянга гаруй цэргийг Орос руу илгээжээ. Хэдийгээр өнгөрсөн оны 12 дугаар сард тэднээс 1000 орчим нь эх орондоо буцаж ирсэн боловч тэднийг тун удахгүй фронт руу дахин илгээх төлөвтэй байна гэж Өмнөд Солонгосын тагнуулууд мэдээлжээ.
2024 оны зургаадугаар сард байгуулсан түншлэлийн гэрээний хүрээнд Умард Солонгос, ОХУ цэрэг, дипломат болон эдийн засгийн салбарт хамтын ажиллагаагаа эрчимжүүлж байгаа юм.
Пёньян Оросын талд үзүүлж буй дэмжлэгийнхээ хариуд тагнуулын хиймэл дагуул, цөмийн хөдөлгүүрт шумбагч онгоцны болон цөмийн цэнэгт хошууны овор хэмжээг багасгах зэрэг чухал технологиудыг олж авахыг эрмэлзэж байна гэж олон улсын ажиглагчид дүгнэжээ.
Эх сурвалж: Yonhap
