Үндэсний их баяр наадмыг зохион байгуулах хорооны ээлжит хуралдаанаар Тулгар төрийн 2234, Их Монгол Улсын 819, Үндэсний эрх чөлөө, тусгаар тогтнолоо сэргээн мандуулсны 114, Ардын хувьсгалын 104 жилийн ойн баяр наадмын нээлт, хаалтын ёслолын найруулагчаар Төрийн соёрхолт, урлагийн гавьяат зүтгэлтэн Н.Наранбаатарыг сонголоо.
Түүнийг Соёл, спорт, аялал жуулчлал, залуучуудын яамнаас санал болгож, Үндэсний их баяр наадмыг зохион байгуулах хорооны гишүүдийн олонхийн саналаар дэмжсэн байна.
Монгол Улсын Шадар сайд С.Амарсайхан баяр наадмын зохион байгуулалтад шинэ техник, технологийн дэвшлийг ашиглах, олон үндэстэн, ястны түүх уламжлал, өв соёл, төрт ёсны үнэт зүйлсийг илүү өргөн хүрээнд харуулах шаардлагатайг онцолсон. Тиймээс нээлт, хаалтын ёслолын агуулгад онцгой анхаарч, сонирхолтой шийдлүүдийг хэрэгжүүлэхийг холбогдох албаныханд үүрэг болгожээ.
Наадмын зохион байгуулалтын хяналт, гүйцэтгэлийг хариуцах ажлын хэсэг байгуулагдсан бөгөөд уг хэсгийг Соёл, спорт, аялал жуулчлал, залуучуудын сайд Ч.Номин ахлахаар болсон байна.
Дараагийн хуралдаанаар наадмын нээлт, хаалт, үндэсний бөхийн барилдааныг телевизүүдээр хэрхэн шууд дамжуулах асуудлыг хэлэлцэх бөгөөд наадмын төсвийг эцсийн байдлаар батлах юм. Мөн энэ жилийн Үндэсний их баяр наадмын нээлт, хаалт, хүндэтгэлийн концертын бэлтгэлийн явцтай зургаадугаар сарын 15-нд танилцахаар төлөвлөжээ.
