Америкийн рэппер A$AP Rocky буюу жинхэнэ нэр нь Раким Майерс хуучин найз руугаа буудсан хэрэгт гэм буруугүй болох нь тогтоогджээ.

Мягмар гарагт Лос-Анжелесын тангарагтны шүүх түүнийг холбогдсон хоёр хэргийг хэрэгсэхгүй болгох шийдвэр гаргасан байна. Хэрэв буруутай гэж үзвэл тэрбээр 24 хүртэлх жилийн хорих ялаар шийтгэгдэх магадлалтай байсан аж.

Маргаан болон хуурамч мэдүүлгийн хэрэг

2021 оны 11 дүгээр сарын 6-ны өдөр Холливүүдийн гудамжинд болсон маргааны үеэр A$AP Relli нэрээр танигдсан Терелл Эфрон өөр рүү нь рэппер A$AP Rocky гал нээсэн гэж мэдүүлж байжээ. Харин R.Майерс уг мэдэгдлийг үгүйсгэж, зэвсэг нь хуурамч буу байсан гэж тайлбарласан байна. Түүнчлэн, Т.Эфрон хуучин найз нь мөнгөний төлөө худал мэдүүлэг өгсөн гэж үзэж байгаагаа илэрхийлжээ.

Шүүхийн шийдвэр ба түүний сэтгэл хөдлөл

Мягмар гарагт Лос-Анжелесын тангарагтны шүүх Р.Майерсыг гэм буруугүй гэж үзсэн эхний шийдвэрийг танилцуулсан даруйд шүүхийн танхимд байсан хүмүүс баяр хөөртэй хашгиран, алга ташсан байна. Рэппер өөрийн гэр бүлийнхнийгээ тэврэн авсан бөгөөд хоёр дахь шийдвэр гарах үеэр өмгөөлөгч нараа тэвэрч нулимс унагаж байсан нь харагджээ.

Түүний хариу мэдэгдэл

Р.Майерс "Миний амьдралыг аварсан Бурханд баярлалаа" хэмээгээд, 12 хүний бүрэлдэхүүнтэй шүүгчдийн багт мөн талархал илэрхийлсэн байна.

Түүний хуучин найз Т.Эфронтой холбоотой нөхцөл байдлын тухайд, тэд Нью-Йоркийн ахлах сургууль төгссөн цагаасаа танил бөгөөд A$AP Mob нэртэй хип-хоп хамтлагийн гишүүд байжээ.

Эх сурвалж: BBC