ШУТИС-ийн хичээлийн 4-р байр буюу Үйлдвэрлэлийн технологийн сургуулийн барилгыг буулгаж, тухайн газарт нь Боловсролын үнэлгээний төвийг барих гэж байгаа гэх асуудлыг тус сургуулийн багш, ажилтнууд нийтэд мэдээлж, эсэргүүцэж буйгаа илэрхийлсээр байгаа. Мөн тус сургуулиас түр хороо байгуулсан бөгөөд БШУЯ-нд албан бичиг хүргүүлжээ.
Тэгвэл салбарын яамнаас хариу албан бичиг хүргүүлж, мөн БШУ-ны сайд Л.Энх-Амгалан тайлбар хариу өгчээ.
Тэрээр "Боловсролын үнэлгээ мэдээллийн нэгдсэн төвийн барилгыг ШУТИС-ийн 4 дүгээр байрны газарт барихгүй гэдгийг хариуцлагатайгаар мэдэгдэж байна.
ШУТИС-ийн удирдлагуудын зөвшөөрлөөр бусдад алдагдсан газрын төлөө Түр хороо яамтайгаа хамтарч тэмцээрэй. Алдагдсан газраа эргүүлж авъя. Инженергүй улс хэзээ ч хөгжихгүй гэдэг үзэлдээ бат итгэнэ" хэмээн мэдэгджээ.
