ЭМЯ-ны ээлжит мэдээллийн үеэр БШУЯ-ны Ерөнхий боловсролын бодлогын газрын дарга Т.Ням-Очир хичээл сургалтыг хэрхэн зохион байгуулах талаар мэдээлэл хийлээ.

Тэрээр "Өнөөдрийн байдлаар нийслэлийн есөн дүүрэг, 13 аймгийн 19900 багш өндөржүүлсэн бэлэн байдлын үед хичээл сургалтыг хэрхэн зохион байгуулах талаар сургалтад хамрагдаад байна. Үлдсэн найман аймаг энэ өдрүүдэд сургалтаа зохион байгуулна.

Энэ хичээлийн жилд нийслэл болон зургаан аймгийн нийт 377 сургууль нэгдүгээр ангийн элсэлтийг цахимаар зохион байгуулж байна. Зарим сургуулиуд бие даан цахим хэлбэрээр зохион байгуулж байгаа. Өнөөдрийн байдлаар орон нутгийн элсэлт 54, нийслэлийнх 60 хувьтай үргэлжилж байгаа. Наймдугаар сарын 28-н гэхэд элсэлтийн ажил дуусч, эцсийн дүн мэдээ гарна.

2020 оны зургаадугаар сард багшийн сул орон тооны мэдээллийг нэгтгэсэн. Одоогийн байдлаар 3069 багшийн сул орон тоо байгаа. 2350 орчим оюутнууд багш хөтөлбөрөөр төгссөн. Өнгөрсөн жилийн нөөцөнд у орчим багш байгаа. Сургуулийн өөрсдийн сул орон тоон дээр сонгон шалгаруулалт зохион байгуулж байгаа. Хамгийн эрэлттэй нь бага ангийн багш болон математик, гадаад хэл, хөгжим, хими, биологийн багш эрэлттэй байгаа.

Улсын хэмжээнд давхардсан тоогоор 66 компани 140 цэгээр дамжуулан дүрэмт хувцасны борлуулалтыг хийж байна. Нөөц хангалттай байгаа тул санал гомдол бага байна. 

Сурах бичгийн нөхөн хангалт хийгдсэн, сургуулиудад хуваарилах ажил 75 хувийн гүйцэтгэлтэй байгаа гэх дүн мэдээг илрүүлсэн.

Хорио цээрийн дэглэмтэй холбоотойгоор нийт сургуулиудын 89 хувь нь нэгээс хоёр удаагийн ариутгал, халдваргүйжүүлэлтийг хийсэн. Есдүгээр сарын 1-н гэхэд гурав дахь удаагийн халдваргүйжүүлэлтийг хийж, хичээл эхлэх бэлэн байдлыг хангана.

Нийт 2160 гар угаалтуурыг ерөнхий боловсролын сургуулиудад нэмж байршуулсан. Нэг угаалтуурт ногдох хүүхдийн тоо 46 байна. Цаашид гар угаалтуурын тоог нэмэгдүүлнэ" гэлээ. 

Мөн тэрээр "БШУЯ-ны Төрийн нарийн бичгийн даргын зөвлөмжийг сургуулиудад хүргүүлсэн бөгөөд хуучин уламжлалт хэлбэрээр нээлтийн арга хэмжээг зохион байгуулахгүй. Есдүгээр сарын 1-ний өглөөнөөс хичээл, сургалтын үйл ажиллагаа эхэлнэ. Харин хичээл эхлэхээс өмнө тухайн сургууль хичээлийн жилийн онцлог, шинэ багш нарын талаар эсвэл ахмад багш нарынхаа сургаалийг видео хэлбэрээр бэлтгэж хүргэж болно. Харин хүүхдүүд 2013 оноос хойш өмсөж байгаа нэгдсэн загварын дүрэмт хувцсаа өмсөнө. Дүрэмт хувцасны үнэ нэмэгдээгүй. Хүүхдэд ялгаатай байдал үүсгэхгүйгээр дүрэмт хувцсаараа жигдэрнэ" гэлээ.