Нийслэлийн прокурорын газраас яллах дүгнэлт үйлдэж ирүүлсэн Б.Хурц, Б.Бямбажав, Г.Эрдэнэбат, О.Бархасбадь, Ж.Мөнхгал, С.Баяр, Ү.Отгонбаяр, С.Эрдэнэбат, Э.Өлзийбаяр нарт холбогдох хэргийг хянан шийдвэрлэх хуралдаан өнөөдөр өглөө /2020.06.22/ 09:00 цагт товлогдсон байсан ч шүүх хурлыг дахин хойшлууллаа.

Шүүх хуралдаанд улсын яллагч Б.Батсайхан нь мөн өдрийн /2020.06.22/ 11.00 цагт Сүхбаатар дүүргийн эрүүгийн хэргийн анхан шатны шүүхэд Ж.Эрдэнэбат нарт холбогдох эрүүгийн хэргийн шүүх хуралдаанд улсын яллагчаар оролцох болсон буюу шүүх хурал давхацсан талаарх баримтыг тус шүүхэд ирүүлсэн байна. Мөн хэргийн хохирогч болох Т.Чимгээ, Ц.Содномдаржаа нар шүүх хуралдаанд ирээгүй шалтгаанаар шүүх хуралдааныг хойшлуулжээ.

Эрүүгийн хэрэг хянан шийдвэрлэх тухай хуулийн 7.6 дугаар зүйлийн 3 дахь хэсэгт зааснаар шүүгдэгч нарыг өмгөөлөх, өмгөөлүүлэх эрхийг нь хангаж, мөн хуулийн 34.12 дугаар зүйлийн 1 дэх хэсэгт зааснаар шүүх хуралдааныг хойшлуулах үндэслэл болсон тухай Төв аймаг дахь Эрүүгийн хэргийн анхан шатны шүүхээс мэдээлсэн байна.

Б.Хурц нарт холбогдох эрүүгийн хэргийн шүүх хуралдааныг 2020 оны долоодугаар сарын 16-ны өдрийн 09.30 цаг хүртэл хойшлуулжээ.