Нийслэлийн мэргэжлийн хяналтын газраас “Олон улсын хүүхдийн эрхийг хамгаалах өдөр”-ийн хүрээнд нийслэлд худалдаа үйлчилгээ эрхэлдэг зах, худалдааны төв, сүлжээ дэлгүүрүүдэд хяналт шалгалт хийж байна. Одоогийн байдлаар есөн дүүргийн 110 аж ахуйн нэгж, 73 иргэний худалдааны төв, ТҮЦ-ийг шалгажээ. 

Одоогоор 219 зөрчил илрүүлж, 164-г нь газар дээр нь арилгуулахаар улсын байцаагчийн албан шаардлага хүргүүлээд байна. Ихэвчлэн хугацаа нь дууссан, хаяг шошгыг сольсон, бүтээгдэхүүний лац задарсан зэрэг зөрчил илэрсэн. 

Шалгалтын явцад шошгын шаардлага хангаагүй 28 нэрийн таван кг, 2145 ширхэг, 5.5 сая төгрөгийн хүнсний бүтээгдэхүүнийг хүнсний сүлжээ дэлгүүрүүдээс татжээ. Түүнчлэн хадгалалтын горим зөрчсөн, хугацаа нь дууссан 27 нэрийн 527 ширхэг 260.8 мянган төгрөгийн хүнсний бүтээгдэхүүнийг устгасан байна.

Баярын өдрүүдэд НМХГ-ын 150 алба хаагч Сүхбаатарын талбай, Үндэсний соёл амралтын хүрээлэн, Үндэсний цэцэрлэгт хүрээлэн зэрэг нэгдсэн өдөрлөг зохион байгуулах газруудад онцгой хяналт тавин ажиллахаар болжээ.

Эцэг эхчүүдэд өгөх зөвлөмж:

Баярын өдрөөр хүн ихтэй газруудад хүнсний бүтээгдэхүүн худалдаалах тохиолдол олон байдаг. Тиймээс эцэг, эхчүүд баярын үеэр хүүхдэдээ бэлэг болон хүнсний бүтээгдэхүүн худалдан авахдаа найдвартай газраар үйлчлүүлнэ үү.

• Боосон бэлэг дотор байгаа хүнсний бүтээгдэхүүний үйлдвэрлэсэн болон хадгалах хугацааг нэг бүрчлэн үзэж шалгах

• Хаана үйлдвэрлэсэн нь мэдэгдэхгүй, хаяг шошгыг унших боломжгүй, эргэлзээтэй бүтээгдэхүүн сонгохгүй байх.

• Хэт их чихэрлэг бүтээгдэхүүн сонгохгүй байх. Дундаж хэмжээтэй ундаа жүүсэнд гэхэд ойролцоогоор 50-80 гр сахар агуулагддаг бөгөөд энэ нь таны хүүхдэд шүд өвдөх, харшил үүсгэх богино хугацааны нөлөөтэйгөөс гадна цаашлаад зүрх судас, бөөрний өвчлөлд нөлөөлөх сөрөг үр дагавартай юм.

• Амархан муудах, хадгалалтын нарийн горим шаарддаг бүтээгдэхүүн боосон бэлгийг худалдан авахгүй байх. /Жишээ нь, бүржмэл чихэр, кремтэй нарийн боовны төрлийн бүтээгдэхүүн гэх мэт/

• Хямдрал нэрийн дор худалдан борлуулж буй хүнсний бүтээгдэхүүний хугацааг сайтар харж авах,

• Бялуу, хиам зайдсан бүтээгдэхүүн, өндөг гэх мэт түргэн муудах хүнсний бүтээгдэхүүнийг хөргөгчний хэмд хадгалж, тэр өдөртөө хэрэглэж дуусгах.

• Халууны улиралд худалдан авсан хүнсний бүтээгдэхүүнээ автомашиндаа удаан хугацаагаар хадгалахгүй байх.

• Гудамж талбайд ил задгай, машины ард болоод худалдаалж буй хүнсний бүтээгдэхүүнээс авахгүй байх.Дулааны улиралд олон цагаар нар, салхинд байгаа бүтээгдэхүүн чанарын шаардлага хангахгүй, хүний биед сөргөөр нөлөөлдөг. Ингэснээр та бидний үр хүүхэд болзошгүй аюул, хордлого, өвчлөлөөс сэргийлэх юм.

• Хүүхдүүдийг хөдөлгөөнт автомат тоглоом дээр тоглуулахдаа аюулгүй байдлыг бүрэн хангуулах буюу хувь хүмүүсийн баталгаагүй, зориулалтын бус тоглоом дээр тоглуулахгүй байх.

• Нарны хурц туяанаас хамгаалж, малгай, нарны хаалт тогтмол хэрэглэх, наршихаас хүүхдүүдийг хамгаалах.

• Хүүхдийг гадаа тоглосны дараа болон гаднаас орж ирсний дараа даруй гарыг савандаж угаалгах.