Хоёр дахь өдрөө үргэлжилж буй Эдийн засгийн чуулганаар өнөөдөр ядуурлыг бууруулах, хөдөлмөр эрхлэлтийг дэмжих асуудлыг хэлэлцэв.

Эдийн засгийн чуулганд танилцуулагдсанаар Монгол Улсад 2014-2016 онд ядуурлын хэмжээ 21.6-29.6 хувь болж, 146.1 төгрөгөөс бага хэрэглээний зардалтай иргэдийн тоо 634 мянгаас 907 мянга болж нэмэгдсэн байна. Тиймээс ажилгүйдэл ядуурлыг бууруулах, хөдөлмөр эрхлэлтийг дэмжих чиглэлээр хэрхэн зөв бодлого хэрэгжүүлэх асуудлаар холбогдох алба хүмүүс болон хувийн хэвшлийн төлөөллүүд хэлэлцүүлэг өрнүүллээ.

Монголын ажил олгогчдын нэгдсэн холбооны ерөнхийлөгч Х.Ганбаатар:

Манай улсын нийт амын 29 хувь буюу 900 мянган хүн ядуурлын төвшинд байна. Дэлхийн банкнаас  хийсэн судалгаагаар Монголд дээд боловсролтой, мэргэжлийн үнэмлэхтэй хэрнээ ядуу иргэд олон байна гэдэг. Тэгэхээр иргэдийн сэтгэхүй болон эдийн засаг ядуу байна. Эдийн засгийн ядуурлын гол шалтгаан нь хэт жижиг аж ахуйн нэгж олон байгаатай холбоотой. Нийт бүртгэлтэй аж ахуйн нэгжийн 90 хувь нь 1-9 хүнтэй үйл ажиллагаа явуулж байна. Тэгэхээр бид хүчээ нэгтгэж, бизнесээ томруулж, борлуулалтаа сайжруулах хэрэгтэй. Бид ажилтай ядуучуудаа эдийн засгийн чадавхтай болгомоор байна. Бид байгалийн баялагтай, хүн ам цөөн, дээд боловсролтой хэдий ч ядуурлын хэмжээ өндөр байгааг анхаарах хэрэгтэй.

МУИС-ийн Эдийн засгийн танхимын профессор Б.Алтанцэцэг: 

Иргэдэд бэлэн мөнгө тарааж, халамжийг хавтгайруулах нь ажил эрхлэлтийг бууруулдаг гэсэн судалгаа байдаг. Манай улсын хувьд зорилтот бүлэгт биш нийтийг хамарсан халамжийг хүртээж байгаа нь ажил эрхлэлтийг бууруулж байна. Нийгмийн халамжид хамрагдалт манай улсад 53 хувьтай буюу хүн амын гуравны нэгд хүрч байгаа бол Өмнөд Солонгост 14 хувь байна. Мөн даатгал хүртээмж тус улсын хүн амын 96 хувийг эзэлдэг.

Ард санхүүгийн нэгдлийн гүйцэтгэх захирал Ч.Ганхуяг:

Бид өнгөрсөн хугацаанд маш олон аргаар ядуурлыг бууруулах чиглэлээр олон улсын байгууллагатай хамтран ажиллаж байсан. Гэхдээ Засгийн газар болгон ядууралтай нэг л аргаар тэмцээд байна. Тэгэхээр бид үр дүн гарах урт хугацаанд бодлого явуулах хэрэгтэй байна. Манай боловсролын систем зах зээл дээр байгаа ажлын байранд таарсан боловсролыг өгч, шаардлага хангасан боловсон хүчин бэлдэж чадаж байгаа юу. Яагаад бид тэд нарыг ажлын байранд бэлдэх талаас нь харж болохгүй гэж. Халамжийн бодлого хүмүүсийг бэлэнчлэх сэтгэлгээ рүү хөтөлж байна. Илүү үр дүнтэй, урт хугацааны, сонгуулийн циклд багтдаггүй бодлого боловсруулах хэрэгтэй.

Хөдөлмөр нийгмийн хамгааллын сайд С.Чинзориг: 

Монгол улсын ядуурал аль 1995 онд 35 хувьтай байсан. Тухайн үед Дэлхийн банкнаас ядуурлыг бууруулах төсөл хөтөлбөрийг хэрэгжүүлж байсан ч өнөөдөр 29.6 хувьтай байна. Өөрөөр хэлбэл, энэ олон жилийн хугацаанд ядуурлын хэмжээ тийм ч буурсангүй. Ядуурал эдийн засгийн өсөлттэй шууд хамаарна. Эдийн засаг саарахаар ядуурал ихэсдэг. Халамж байх ёстой хэмжээнд байх ёстой ч амьжиргаанаас доогуур хэмжээний халамж өгчихөөд халамж хүртээж байна гэж хэлж болохгүй. Засгийн газраас нийгмийн хамгааллын хөтөлбөрүүдийг хэрэгжүүлээгүй бол ядуурал 40 хувьд хүрэх байсан. Тэгэхээр халамжийг шууд үгүйсгэж болохгүй. Өнгөрсөн онд эдийн засгийн өсөлт 5.1 хувиар өсөхөд ажиллагсдын тоо 90 мянгаар нэмэгдсэн. Гэвч уул уурхайн салбар хасах өсөлттэй гарсан бол боловсруулах салбарын эдийн засгийн өсөлт сайжирсан. Тиймээс бид боловсруулах салбараа дэмжиж, эдийн засгийн өсөлтөө дээшлүүлэх хэрэгтэй байна.