ОХУ-ын Дээд боловсрол, шинжлэх ухааны сайд ноён В.Н.Фальков олон нийтэд хандан өчигдөр хийсэн мэдэгдэлдээ “хичээлийн жилийг Есдүгээр сарын 1-ний өдөр эхлүүлэх ба тухайн үеийн нөхцөл байдалдай уялдуулан сургалтын хэлбэрийг сонгох”-оо зарлажээ.
Тэрээр өөрийн мэдэгдэлдээ, 2020 оны гуравдугаар сарын 16-ны өдрөөс тус улсын их, дээд сургуулиуд зайн сургалтын хэлбэрт шилжсэнийг дурдаад шинэ нөхцөл байдалд зайн сургалтад шилжих явцад их, дээд сургуулиуд
- Чанартай боловсролыг олгох сургалтын үйл ажиллагааг зохион байгуулах;
- Цахим орчинд ажиллах ур чадваргүй их, дээд сургуулийн багш нарт дэмжлэг үзүүлэх;
- Оюутнуудад дэмжлэг үзүүлэх гэсэн гурван чиглэлд анхаарлаа хандуулж ажилласныг тэмдэглэв.
Тус улсын их, дээд сургуулиудын зайн сургалтын зохион байгуулалт, хэлбэр болон чанарын талаарх оюутнуудын үнэлэмж янз бүр байгааг дурдаад Оросын Дээд боловсрол, шинжлэх ухааны яам их, дээд сургуулиудын сургалтын төлбөр болон оюутнуудад үзүүлэх багц арга хэмжээний талаар шийдвэр гаргах чиглэлээр ажиллаж байгааг дурдсан байна.
Мөн цар тахлын улмаас ОХУ-д үүсээд байгаа нөхцөл байдлаас шалтгаалан энэ оны Зургадугаар сарын 8-ны өдөр зохион байгуулахаар төлөвлөсөн байгаа Улсын нэгдсэн шалгалтын товыг өөрчлөх магадлалтай байгаа бөгөөд шалгалтын тов майн баярын дараа гарах аж.
Харин соёл, урлагийн их, дээд сургуулиудад элсэн ороход шаардагддаг мэргэжлийн шалгалтыг ямар байдлаар зохион байгуулахыг Соёлын яамтай зөвлөлдөн хэлэлцэж байгаа юм байна.
