Тус цуврал бүтээл нь шинжлэх ухааны олон салбар, чиглэлийн мэдлэгийг энгийн ойлгомжтой хэлбэрээр бичсэнээрээ онцлог бөгөөд хүүхэд, багачуудад шинжлэх ухааны мэдлэг олгох, цаашлаад шинжлэх ухаанч иргэн болгон төлөвшүүлэхэд ихээхэн ач холбогдолтой юм.

Энэ үеэр ШУА-ийн ерөнхийлөгч Д.Рэгдэл, “Шинжлэх ухааны байгууллагын үндсэн үүрэг нь нийгмийг соён гэгээрүүлэх ажил байдаг. Энэхүү өргөн асуудлын хүрээнд ШУА залуу хойч үедээ зориулан орчин үеийн шинжлэх ухааныг сонирхолтой хэлбэрээр бичсэн  жижиг товхимлыг  зургаа дахь жилдээ хэвлэн гаргаж байна. Энэхүү цувралыг бид Нийслэлийн Боловсролын газраар дамжуулан хүүхэд багачуудын гарт хүргэдэг уламжлалтай. Энэ уламжлалаараа 10 цуврал 300 багц номыг та бүхэндээ гардуулж байна” гэлээ.

Мөн ШУА-иас “Нэг эрдэмтэн, нэг лекц” хөтөлбөр хэрэгжүүлж энэ хүрээнд бэлтгэсэн 191 лекцийн жагсаалтыг Нийслэлийн Боловсролын газрын дарга Ж.Гантулгад гардуулсан юм. Эдгээр эрдэмтний лекцийг холбогдох үйл явдлын үеэр уншуулах хэрэгцээ шаардлага гарвал манай эрдэмтэн, судлаачид  хамтран ажиллахад бэлэн гэдгийг ШУА-ийн ерөнхийлөгч хэлж байлаа.

Харин Нийслэлийн Боловсролын газрын дарга Ж.Гантулга эрдэмтдийн лекцээр тусгай контент хийж хамтран ажиллах саналтай байгаагаа мөн энэ үеэр илэрхийлсэн юм.  

ШУА-ийн эрдэмтдийн энэ онд гаргаж буй цувралыг “Хиймэл оюун ухаан”, “Гурван хэмжээст хэвлэл”, “Таван хошуу малын мах”, “Монгол тарвага”, “Шингэн алт үйлдвэрлэгч шидтэн”, “Чихрийн тухай ойлголт”, “Тэгш хэмийн гайхамшиг”, “Усны эрчим хүч”, “Агаар мандал”, “Удамшил” зэрэг сэдвээр бичжээ.