Улсын Онцгой комиссоос цаг үеийн асуудлаар мэдээлэл хийлээ. УОК-ын өнөөдрийн хуралдаанаар сургууль, цэцэрлэгийн үйл ажиллагааг түр зогсоох хугацааг сунгах эсэх асуудлыг ярилцаагүй бөгөөд БСШУС-ын яамнаас тоо баримт, судалгаатай мэдээллийг танилцуулсан тохиолдолд энэ асуудлыг хэлэлцхээр болсон байна. 

Энэ талаар болон иргэдээс ирсэн асуудлын талаар ЗГОНХХ-ийн дарга Ц.Ганзориг: Хичээл сургууль хойшлуулахтай холбоотойгоор эцэг, эхчүүдээс олон асуулт ирж байгаа. Есдүгээр сарын 1-н хүртэл  ЕБС, Их, дээд сургууль, МСҮТ-үүд хичээллэхгүй байх эсэх, үүнтэй холбоотой техникийн болон бэлтгэл ажлыг хэлэлцэж, олон нийтэд зарлахыг ерөнхий сайд үүрэг болгосон. Өнөөдөр УОК-оор авч хэлэлцээгүй шалтгаан нь бэлтгэл ажлууд дуусаагүйтэй холбоотой. 

Хувийн цэцэрлэг, сургуульд явдаг хүүхдүүд төлбөрөө 100 хувь төлсөн байгаа. Энэ хичээлийн жилийн төлбөрийг бүтнээр нь ирэх жилийн хичээлийн төлбөр рүү шилжүүлэх зохицуулалтыг БСШУСЯ хийсэн. Гагцхүү маргааш НДШ, эдийн засгийн арга хэмжээтэй холбоотойгоор УИХ дээр хууль батлагдана. Үүнтэй холбоотой хүлээлттэй ажиллаж байна. 

Хүүхдүүд улирахгүй, хоцрогдол үүсэхгүй. Төгсөх анийн хүүхдүүд төгсөнө. 

ЭЕШ долоодугаар сарын 2-нд авна. Нэг зарчим баримталж байгаа нь давагдашгүй нөхцөл байдлаас үүдэж дүнгийн түвшинг бууруулахгүй байх, хоцрогдол гаргахгүй, амсуулахгүй байх үүднээс мэргэжлийн байгууллага нь тооцоо судалгаа хийж байна. 

Өнөөдрийн УОК-ын шийдвэрээр 0-12 насны хүүхдүүдтэй болон жирэмсэн эмэгтэйчүүд гэрээсээ цалингаа аваад ажлаа хийх тогтоолыг 4 дүгээр сарын 30-н хүртэл албан ёсоор сунгасан.

Галын шугаманд ажиллаж байгаа эмч, эмнэлэгийн мэргэжлийн ажилтнуудад олон нийтээс өгч байгаа хандвиудаас мөнгөн урамшуулал үзүүлэх шийдвэр гарсан. Мөнгөн урамшууллын хувьд тооцоо судалгаа нь гарахаар олгоод явна. 

Урин дулаан цаг ирж байгаатай холбоотойгоор маскаа зүүхгүй байх тохиолдолд их гарч байгаа учраас маскаа сайн зүүхийг онцгойлон анхааруулж байна" гэлээ.