Чилийн БНУ-ын Боловсролын сайд Раул Фигероа коронавирусийн тархалтын үед үүссэн нөхцөл байдалд хүүхэд, залуучуудын суралцах эрхийг хэрхэн хангаж байгаа талаар болон танхимын сургалтын үйл ажиллагааг буцааж нээхэд ямар бэлтгэл ажил хийж байгаа талаар ярилцлага өгчээ.

Түүний ярилцлагыг бүрэн эхээр нь ЮНЕСКО-гийн цахим хуудаст байршуулсан байна. 

Тус улсад хичээл, сургалтын үйл ажиллагааг 2020 оны гуравдугаар сард хааснаас хойш “Би онлайнаар суралцаж байна” нэртэй платформыг үүсгэн ерөнхий боловсролын сургуулийн бүх ангийн сурагчдад зориулсан сургалтын баазыг бий болгосон байна.

Мөн сурагчдад тасралтгүй суралцах боломжийг олгох зорилгоор Чилийн үүрэн холбооны операторуудтай хамтран ажиллаж, хүүхэд, залуучуудад үнэгүй интернет ашиглах боломжийг олгожээ. Их, дээд сургуулийн оюутнуудын хувьд 10000 гаруй номын фондтой тоон номын сангаар үнэгүй үйлчлүүлэх боломжийг олгожээ.

Түүнчлэн Чилийн Боловсролын яам нь боловсролын байгууллагуудад хичээлийн бэлтгэлийг хангах, сургалтын процессыг хянахад техникийн дэмжлэг үзүүлэх зорилгоор "Google" болон Чилийн сантай хамтран "G Suite for Education", "Google Classroom" системийг ашиглах нөхцөлийг бүрдүүлсэн байна. Эдгээр систем нь багш нарт хичээлээ бэлтгэх, сурагчдын гэрийн даалгаврыг хянах, сурагчидтайгаа шууд харилцахад дэмжлэг болж байгаа аж.

Интернет болон орчин үеийн технологи ашиглах боломжгүй сурагчдад “Би гэртээ суралцаж байна” хөтөлбөрийг боловсруулан, хэрэгжүүлж байгаа юм байна. Хөтөлбөрийн хүрээнд хөдөө орон нутгийн 3700 сургуулиудад хэвлэмэл сургалтын материалыг хүргүүлсэн байна.

Танхимын сургалтын үйл ажиллагааг буцаан нээхэд сургалтын үйл ажиллагааг тасралтгүй зохион байгуулах нь чухал гэдгийг Чилийн Боловсролын сайд онцлон тэмдэглэжээ.

Эх сурвалж: БСШУСЯ