Энэ харамсалтай явдал энэ сарын 4-ний өдөр болжээ. Өмнөговь  аймгийн Цогтцэций сумын нутагт  үйл ажиллагаа явуулдаг “Эрдэнэс Тавантолгой” компанийн  олборлолтын талбайд ажиллаж байсан 43 настай иргэн А хүнд даацын дозер маркийн автомашинд дайруулж амиа алдсан байна. Эх сурвалжийн хэлснээр талийгаач нүүрсний овоолго хийж байгаад машинаа унтраалгүй бууснаас осол гарсан бололтой.

Харин “Эрдэнэс Тавантолгой” компанийн удирдлагууд уг хэргийг гадагшаа задруулахгүй байх үүргийг бүх ажилтнууддаа өгч, хэргийн талаар мэдээлэл задалбал ажлаас хална хэмээн сүрдүүлсэн гэнэ. Тэр нь ч үр дүнгээ өгсөн бололтой. Өнөөдрийг хүртэл төвийн хэвлэлүүдээр “Эрдэнэс Тавантолгой”-д болсон ийм осол болсон тухай мэдээлсэнгүй. Харин талийгаачийн ар гэрийнхэнд осол болсноос хойш хоёр хоногийн дараа л мэдэгджээ.

Ослын шалтгааныг Өмнөговь аймгийн Цагдаагийн хэлтэс шалгаад “Хөдөлмөрийн аюулгүй байдлын дүрэм зөрчсөнөөс үүдэлтэй” гэдэг дүгнэлт гаргажээ. Үхсэн хүн үг хэлдэггүй гэдэг болохоор бурууг талийгаачид тохоод өнгөрөх сонирхол компанийн удирдлагуудад байж болох л юм. Хэрэв тийм биш бол яагаад осол гарсан даруйд ар гэрт нь мэдэгдэлгүй хоёр хоног нуусан байх вэ?

Болсон явдалд компани буруугүй байсан бол ядаж л ар гэрийнхэн лүү яаралтай утас цохиж, эмгэнэл илэрхийлэх нь албан байгууллагын наад захын ёс зүй биш гэж үү?

Сануулахад тус компанийн захирал саяхан ажлаа хүлээлгэж өгч, Б.Ганхуяг гэгч эрхэм “Эрдэнэс Тавантолгой” компаний гүйцэтгэх захирлаар томилогдоод байгаа. Шинэ захирлын ажлын гараа  хүний амины барцадтай эхэлж байгаа нь харамсалтай ч хүнээ алдсан ар гэрийнхэнд илүү эмгэнэлтэй байж таарна. Монголын компаниуд хэзээ нэг хүнийг хүн шиг үздэг болно доо...

Б.ЗАЯА