Өнөөдөр Ерөнхий боловсролын сургуулийн сурагчдаас анги дэвших болон улсын шалгалт авахгүй байхаар БСШУСЯ-наас шийдвэрлэсэн тухай мэдээлсэн билээ. 

Харин ЭЕШ-ыг товлосон хугацаандаа авах юм. Шалгалтыг зургаадугаар сарын 8-11-нд авахаар төлөвлөсөн байгаа билээ.

Энэ хугацааг өөрчлөхгүй гэж БСШУС-ын сайд Ё.Баатарбилэг өнөөдөр мэдээлсэн юм. 

Коронавирусийн халдвараас урьдчилан сэргийлэх үүднээс улс даяар гуравдугаар сарын 30-ныг хүртэл хөл хорио тогтоогоод байгаа. Үүнээс шалтгаалан шалгалтыг зөвхөн заавал үзэх судлагдахуунаар авахаар болжээ. Өмнөх жилүүдэд заавал үзэх судлагдахуун болон сонгох судлах агуулгыг хамтатган авдаг байсан юм. 

Сурагчид хөл хорионы хугацаанд багшаас хол, сонгон хичээллэх боломжгүй, зөвлөгөө тусламж авах боломж нь бага байгаа тул ийнхүү шийдвэрлэсэн байна.

Мөн элсэлтийн ерөнхий шалгалтаас өмнө Монгол хэлний эхний шалгалтыг дөрөвдүгээр сарын 25-нд авна. Хэрэв Монгол хэлний шалгалтдаа босго 400 оноогоо авч чадаагүй бол тавдугаар сарын 16-нд дахин шалгалтад орох ёстой юм.

Хоёр шалгалтад босго оноогоо аваагүй бол Элсэлтийн ерөнхий шалгалт өгөх эрхгүй болно юм.

ЭЕШ-ын бүртгэл хоёрдугаар сарын 10-ны өдрөөс дөрөвдүгээр сарын 18-ны өдрийн 18:00 цаг хүртэл үргэлжилнэ.

Харин их, дээд сургуулийн элсэлтийг зургаадугаар сарын 15-нд дуусгахаар төлөвлөж байгаа аж.