Нутаг дэвсгэрийнхээ 90 гаруй хувь нь цөлжилтөд өртсөн Дундговь аймаг усны нөөц, бэлчээрийн менежмент, экологийн нөхөн сэргээлтийн чиглэлээр гурван санаачилга боловсруулж, Цөлжилттэй тэмцэх тухай НҮБ-ын конвенцын Талуудын 17 дугаар бага хурал (COP17)-д оролцож байна.

Улаанбаатар хотноо эхэлсэн COP17-д НҮБ-ын конвенцын 197 талын төлөөлөгч оролцож, цөлжилт, газрын доройтол, гангийн эрсдэлийг бууруулах, газрыг нөхөн сэргээх болон уур амьсгалын өөрчлөлттэй холбоотой асуудлыг хэлэлцэж байна.

Аймгийн нутаг дэвсгэрийн 85.7 хувь нь хүчтэй болон нэн хүчтэй цөлжилтийн зэрэглэлд хамаарч байна. Энэ нь говийн бүсэд усны хомсдол, бэлчээрийн доройтол, газрын элэгдэл зэрэг асуудалд цогц арга хэмжээ шаардлагатайг илтгэжээ. Дундговь аймаг COP17-д "Цөлийн хөгжил" санаачилгаа танилцуулна.

Тус ажлын хүрээнд авто зам, сум суурингийн орчимд салхины хамгаалалтын ногоон зурвас байгуулах, малчин өрхийн өвөлжөө, хаваржааны орчмын бэлчээрийг нөхөн сэргээх, хөв цөөрөм байгуулж хур борооны усыг хуримтлуулах, ундны усны эх үүсвэрийг хамгаалах, бэлчээрийн даацад нийцсэн мал аж ахуйг хөгжүүлэх арга хэмжээг тусгажээ.

Дундговь аймгийн Залуучуудын холбоо "Цэнхэр ус ногоон говь", "Ундны усны чанар эрүүл ахуйд нөлөөлөх нь" сэдвийн хүрээнд усны нөөц, цөлжилтийн асуудалд залуучуудын дуу хоолой, орон нутгийн санаачилга, хэвлэл мэдээллийн оролцоог нэмэгдүүлэх чиглэлийн ажлаа танилцуулна.

Дэлхийн 40 гаруй орны хотын удирдлагууд оролцох COP17-гийн Хотын дарга нарын форумд Дундговь аймгийн Засаг дарга С.Мөнхчулуун үндсэн илтгэгчээр оролцож, Мандалговь хотын экологийн нөхөн сэргээлт, цөлжилт, шороон шуургатай тэмцэж буй туршлага, цаашид хэрэгжүүлэх шийдэл, хамтын ажиллагааны саналаа дэвшүүлнэ. "Тэрбум мод" үндэсний хөдөлгөөний хэрэгжилт, хөрөнгө оруулалт, аймгуудын сайн туршлага, тулгамдсан асуудал болон банк, санхүүгийн байгууллагын оролцооны талаарх хэлэлцүүлэгт чиглүүлэгчээр ч оролцоно.

Говийн бүс нутгаас УИХ-д сонгогдсон Л.Мөнхбаясгалан, Ц.Мөнхбат, Р.Сэддорж нар Хэрлэн тоонот, Орхон–Онги цагаан бургастайн төслийн ТЭЗҮ-ийг УИХ-аар батлуулсан бөгөөд COP17-гийн хүрээнд энэхүү асуудлыг хөндсөн саналаа хүргүүлж оролцохоо илэрхийлэв.

Эдгээр санаачилга, шийдлээр усны нөөцийг хамгаалах, хур тунадасны усыг хуримтлуулах, бэлчээрийг нөхөн сэргээх, цөлжилт, тоосжилт, шороон шуурганы эрсдэлийг бууруулах чиглэлээр олон улсын хөрөнгө оруулалт, технологи, хамтын ажиллагааг татахыг зорьж байна.