Монгол Улсын Төсвийн тухай хуульд заасны дагуу Нийслэлийн Засаг дарга бөгөөд Улаанбаатар хотын захирагч Б.Пүрэвдагва нийслэлийн 2027 оны төсвийн төслийг НИТХ-ын дарга Д.Ихбаярт өргөн барьжээ.
Нийслэлийн 2027 оны төсвийн төсөлд нийт орлогыг 4.6 их наяд төгрөг байхаар тооцсон бөгөөд энэ нь өмнөх оныхоос 600 орчим тэрбум төгрөгөөр буурсан байна.

Хотын дарга Б.Пүрэвдагва “Иргэн төвтэй байх зарчмыг баримталж, иргэдээс авсан санал асуулга, судалгаанд үндэслэн нийслэлийн өмнө тулгамдаж буй агаар, орчны бохирдол, авто замын түгжрэл, дэд бүтцийн хүртээмж, засаглалын асуудал гэсэн дөрвөн хэсэгт хуваан төсвийн төслийг боловсрууллаа. Мөн төсөв, хөрөнгө оруулалтын эрх мэдлийг дүүрэг, хороонд түлхүү шилжүүлж, иргэдийн тулгамдсан асуудлыг газар дээр нь шийдвэрлэхэд чиглэсэн төсөл, ажил хэрэгжүүлэхээр тусгасан. Өнгөрсөн жилүүдэд нийслэлд хэрэгжсэн төслийн гол эх үүсвэр нь нийслэлийн төсөв байсан. Харин ердөө долоон хувь нь бусад эх үүсвэрээс хэрэгждэг байжээ. Хотын эрх зүйн байдлын тухай хуулиар олгосон боломж, бололцоо байгаа учраас нийслэл цаашид хувийн аж ахуйн нэгжүүдтэй хамтарч, тулгамдаж буй асуудлуудыг шийдэх, эргээд бизнесүүд ашиг орлоготой байх бодлогыг барин ажиллаж байна. Ирэх жилүүдэд хотын эдийн засгийн тэнцвэрийг сайжруулж, бизнесүүдээ дэмжинэ” гэлээ.
Монгол Улсын Төсвийн тухай хуульд нийслэлийн төсвийг жил бүрийн арваннэгдүгээр сарын 25-ны дотор НИТХ-д өргөн мэдүүлж, арванхоёрдугаар сарын 5-ны дотор батлахаар заасан байна.



