НҮБ-ын Цөлжилттэй тэмцэх тухай конвенцын талуудын 17 дугаар бага хурал Улаанбаатар хотноо энэ сарын 17-28-нд үргэлжилж байна.

Монгол Улсад зохион байгуулж буй тус хурлын хүрээнд Өмнөговь аймаг газрын доройтол, цөлжилттэй тэмцэх, усны нөөцийг хамгаалах, экосистемийг нөхөн сэргээх чиглэлээр орон нутагт хэрэгжүүлж буй төсөл, хөтөлбөр, сайн туршлагаа олон улсын оролцогчдод танилцуулав. “Нутгийн заг” санаачилгын хүрээнд  заг тарих талбай байгуулах, агро ой хөгжүүлэх замаар малын тэжээл, эмийн ургамал тариалах боломжийг судалж байна.

Цогт-Овоо, Ханхонгор, Мандал-Овоо, Баяндалай, Хүрмэн суманд энэ онд тус бүр 500 га талбайд заг тарих, болон агро ой хөгжүүлэх ТЭЗҮ боловсруулах ажилд нийт 60 сая төгрөгийн төсөв баталж, худалдан авах ажиллагааг зохион байгуулжээ. Харин 2025 онд Манлай, Ханбогд, Баян-Овоо, Номгон, Цогтцэций сумдад тус бүр 500 га талбайд загаар ойжуулах, агро-ой хөгжүүлэх ТЭЗҮ боловсруулах ажил мөн 60 сая төгрөгийн төсөвтэй хэрэгжүүсэн байна.

Усны нөөцийг нэмэгдүүлэх, хур тунадасны усыг хуримтлуулах чиглэлээр Манлай сумын нутагт хөв цөөрөм байгуулах ажилд орон нутгийн хөгжлийн сангаас 228 сая төгрөг төсөвлөсөн бол Хүрмэн суманд булгийн эхийг хашиж хамгаалах, хөв цөөрөм байгуулах ажилд 445.4 сая төгрөгийг зарлажээ. Түүнчлэн таван хөв цөөрмийг түшиглэн ойн зурвас байгуулах ТЭЗҮ боловсруулах ажилд орон нутгийн төсвийн хөрөнгөөр 70 сая төгрөг төсөвлөсөн байна.

Онгийн голын дагуу 500 га талбайд “Ногоон хэрэм” байгуулах, ойн зурвас бий болгох, тэжээлийн ургамал тариалах ТЭЗҮ боловсруулах ажилд мөн орон нутгийн төсвөөс 80 сая төгрөг төсөвлөжээ.

Түүнчлэн Өмнөговь аймаг говийн бүсийн ховор, нэн ховор амьтан, ургамлыг судлах, хамгаалах, нөхөн сэргээх чиглэлээр эрдэм шинжилгээний мэргэжлийн болон төрийн бус байгууллагуудтай хамтран ажиллаж, ховор ургамлын төлөөлөл болох Грубовын хөөндий, танамал махирс зэрэг ургамлыг эд, эсийн өсгөврийн аргаар үржүүлэх судалгаа хийгдэж, нөхөн сэргээлтэд ашиглах боломжийг тодорхойлсон байна.

Өмнөговь аймаг нь 165 мянган хавтгай дөрвөлжин километр нутаг дэвсгэртэй, 15 сум, 59 багтай, говь, цөлийн бүсэд оршдог. Ховор болон ховордож буй эмийн ач холбогдол бүхий 250 орчим зүйлийн жижиг навчит, бутлаг ургамал ургадаг, ирвэс, хулан, хар сүүлт, аргаль, янгир, шилүүс зэрэг ховордсон амьтад тархдаг. Тиймээс Өмнөговь аймаг орон нутагт хэрэгжүүлж буй бодит ажил, туршлагаа олон улсын түвшинд танилцуулснаар байгаль орчны чиглэлээр хамтын ажиллагаагаа өргөжүүлэх, хөгжлийн түншүүдийн дэмжлэг, хөрөнгө оруулалтыг татах, газрын доройтол, цөлжилттэй тэмцэх төсөл, хөтөлбөрүүдийн цар хүрээг нэмэгдүүлэх боломжийг бүрдүүлэх ач холбогдолтой юм.